Голливуд юлдузи Деми Мур озиш учун кунига 96 км масофани велосипедда босиб ўтгани ҳақида гапирди

Голливуднинг 1990 йиллардаги машҳур актрисаси Деми Мур иккинчи қизи дунёга келгач, қоматини тиклаш учун саъй-ҳаракатлари ва кетказган вақти ҳақида сўзлаб берди. Гўзал кўринишга қисқа муддатда қайтиш учун актриса ўз соғлиғини хавф остига қўйган ва организмини мураккаб машқлар билан чарчатган.

1991 йилда Деми Мурнинг қизи Скаут Уиллис дунёга келгандан атиги олти ой ўтиб актриса суратга олиш майдонига қайтди. У ишга велосипедда боришга қарор қилди ва ҳар куни қарийб 96 километр масофани босиб ўтди.

“Мен қизимга кечаси билан қараб чиқар, парваришлар эдим. Сўнг эрта тонг бўлмасидан аввал қоронғида ўрнимдан туриб, мураббийим билан Paramountъгача велосипедда борар эдим. “Номақбул таклиф” фильмини суратга олиш майдонида деярли ярим кун ишлар эдим ва 12 соатлик меҳнатдан кейин уйимга — қизим олдига қайтар эдим”, деди Мур CBS Sunday Morning телеканалига берган интервьюсида.

Ҳозирда актриса ўзининг бундай қилганидан пушаймон ва ўша даврлар ташқи кўриниши ва қадди-қоматига кўп эътибор берганидан афсусда:

“Туғруқдан аввалги ҳолатимга қайтиш учун ўзимга ҳаддан ортиқ босим ўтказганман”, дейди актриса.

Америкалик актриса, модел ва қўшиқлар муаллифи Демир Мур 1962 йилда Нью Мексико штатининг Розуэлл шаҳрида туғилган. Голливуд юлдузи фильмографиясида ўттиз йилдан кўпроқ вақт давомида энг муваффақиятли фильм — режиссёр Жерри Сукернинг “Арвоҳ” мелодрамаси бўлди. Деми Мур иштирокидаги 1990 йилда намойиш этилган картина энг юқори даромад келтирган фильмга айланди. Фильм беш маротаба “Оскар” мукофотига, Мур эса ”Олтин глобус”га номзод бўлган.