18-mart kuni Gollivuddagi Shon-shuhrat xiyobonida 2804-yulduz ochilishining tantanali marosimi bo‘lib o‘tdi. Bu sharafga isroillik aktrisa Gal Gadot loyiq topildi. Uning yulduzi endi 6840 Hollywood Boulevard manzilida, El Capitan teatri oldida joylashgan.
Marosimda Vin Dizel, Paloma Jimenez hamda Gal Gadotning yaqinlari va qarindoshlari ishtirok etdi.
Marosim o‘tkazilgan joyning yonida bir vaqtning o‘zida Isroilga qarshi va Isroilni qo‘llab-quvvatlovchi aksiyalar o‘tkazilayotgan edi.
Gal Gadot 1985-yilda Isroilning Rosh-hayin shahrida tug‘ilgan. U Isroil mudofaa kuchlarida xizmat qilgan. Gal Gadotning professional modellik faoliyati 2004-yilda “Isroil go‘zali” tanlovida g‘olib chiqqanidan keyin boshlangan. O‘sha yili u Ekvadorda o‘tkazilgan “Dunyo go‘zali” tanlovida Isroilni himoya qilgan. Keyinchalik u yirik Isroil firmalarining reklama kampaniyalarida ishlagan. Gal Gadot o‘zining kinodagi birinchi rolini 2007-yilda “Bubot” (“Qo‘g‘irchoqlar”) Isroil serialida ijro etgan. Shundan keyin u Gollivudda eʼtibor qozondi va “Forsaj 4” filmida ishlashga taklif qilindi.
U “Forsaj”ning to‘rtta qismida rol ijro etdi, keyin “Uch to‘qqiz” filmida o‘ynadi va “Betmen va Supermen: adolat tongi” filmida “Mo‘jizakor ayol” rolini oldi. Gal Gadotning kinodagi faoliyati orasida: 2017-yilda chiqqan “Mo‘jizakor ayol” filmi, “Nildagi qotillik”, “Mo‘jizakor ayol 1984”, “Adolat ligasi”, “Uch to‘qqiz”, “Jinoyatchi”, “Forsaj” franshizasi va “Oppog‘oy” filmlari bor. Aktrisa 2023-yil 7-oktyabrdan keyin Isroilni qo‘llab-quvvatlovchi pozitsiyasi uchun bir necha bor hujumlarga uchradi. Gal Gadot eng ko‘p haq to‘lanadigan Isroil modellari qatoriga kiradi. Ammo uning aktrisa sifatidagi daromadi modellik biznesidan olgan daromadidan ancha yuqori. U bir necha marta “Oskar” marosimining boshlovchisi bo‘lgan.
Izoh (0)