Британиялик актёр ва режиссёр Энтони Ҳопкинс илк бор ўз хотиралари баён этилган автобиографик асарини ёзди. Китобнинг анонси эълон қилинган видео актёрнинг Instagram саҳифасида эълон қилинди.
“Оскар” мукофоти совриндори, 87 ёшли актёр асарини “We did it ok, kid” (“Биз буни уддаладик, болакай”) деб номлади. Китобнинг тақдимот санаси 2025 йил 4 ноябрга белгиланган бўлиб, у АҚШ, Буюк Британия, Австралия ва Ҳиндистонда сотувга чиқарилади.
Асар менга манзур бўлди, ўйлайманки, сизга ҳам ёқади, дейди Ҳопкинс видеода.
Британия ОАВ маълумотларига кўра, автобиографияда Ҳопкинс ўзининг болалиги, актёрлик санъатига кириб келиши, карьерасининг муҳим босқичлари ва шахсий ҳаётидаги қийинчиликлар ҳақида ҳикоя қилади. Шунингдек, унда актёрнинг алкоголизм билан кураши ва уни енгиш жараёни ҳам очиқ-ойдин тасвирлаган. Китобда Ҳопкинснинг шахсий фотосуратлари ҳам жой олган бўлиб, улар ўқувчиларга актёрнинг ҳаётига янада яқинроқ нигоҳ ташлаш имконини беради.
“Биз буни уддаладик, болакай” аудиокитоб шаклида ҳам чиқади ва унга актёрнинг ўзи овоз берди.
Ҳопкинс фаолияти давомида 140 та фильм ва сериалларда суратга тушган. Жумладан, “Қўзилар сукунати”, “Ганнибал” ва “Қизил аждарҳо” фильмларида тасвирланган доктор Ганнибал Лектер образлари машҳур. Актёрнинг бошқа таниқли образлари орасида “Сеҳр”, “Фил одам”, Брем Стокернинг “Дракула”си, “Кун қолдиқлари”, “Соялар мамлакати”, “Куз афсоналари”, “Никсон”, “Амистад”, “Зорро ниқоби”, “Танишинг, Жо Блейк”, “Тор”, “Тор: зулмат салтанати”, “Трансформерлар: сўнгги рицар”, “Ота” фильмлари ҳам ўрин олган.
Энтони Ҳопкинс 2000 йилдан бери АҚШда истиқомат қилади. 2003 йилда актёр Голливуд шон-шараф хиёбонида ўз юлдузига эга бўлди, 2008 йилдан эса Британия кино ва телевидение санъати академиясининг аъзоси этиб сайланди. 2021 йилда у “Ота” фильмидаги бош роли учун иккинчи марта “Оскар”ни қўлга киритди ва ушбу мукофотга энг кекса (83 ёш) номзод сифатида тарихда мухрланиб қолди.
Изоҳ (0)