“Титаник” фильмида Кора ролини ижро этган Александра (оддий қилиб айтганда Алекс) Оуэнс-Сарно 1988 йил 9 ноябрда Сан-Диегода таваллуд топган. Жеймс Кемерон эпизодик ва оммавий саҳналар учун очиқ кастинг ўтказаётганида, у онаси ва 3 ёшли синглиси билан бирга танловга келган. Рол учун синовлар тўғридан-тўғри Росарито-Бичдаги суратга олиш майдонида ўтказилган.
Ўша пайтда 3-синфда таълим олаётган Оуэнс-Сарно бошқа ўнлаб қизлар қаторида навбатга турган, у бир неча сўз айтган ва кастинг режиссёри олдида озгина рақс тушган, аммо... рад этилган. Бироқ бир ҳафтадан сўнг унга Кора ролини таклиф қилишди, онаси ва синглиси эса статистлар сифатида тасдиқланди.
Алекс учун бу кинодаги илк қадами эди. Унинг учун суратга олиш ишлари кейинчалик фильмдан олиб ташланган саҳнадан бошланган. Дастлаб сценарийда Коранинг оиласи билан бирга ҳалок бўлиши тасвирланган эпизод мавжуд эди. Оуэнс-Сарно бу трюкни ўзи бажарган ва суратга олиш жараёнида “чўккан”. Аммо кейинчалик бу саҳнани фильмнинг якуний вариантига киритмаслик тўғрисида қарор қабул қилинган.
Аммо фильмга Алексни машҳур қилган бошқа саҳна киритилади — у ДиКаприо билан рақсга тушган саҳна. Роуз билан рақсга тушишдан олдин Жек унга: “Сен мен учун севимли бўлиб қоласан, Кора”, дейди.
Бу ёқимли саҳна миллионлаб томошабинларнинг юрагидан жой олади. Оуэнс-Сарно эслашича, ўшанда у ДиКаприо ким эканлигини ҳатто яхши билмасди. Фақат уйда онаси унга “Гилберт Грэйп” фильмини кўрсатгандан кейин, Алекс Лео аслида профессионал актёр эканлигини тушунади.
“Мен унинг ҳақиқий актёр эканини билмасдим. У менинг дўстим эди ва бу жуда қизиқарли эди”, деб эслайди Алекс.
Актрисанинг айтишича, Лео унга жуда меҳрибон бўлган, унга ерёнғоқ ёғи ва желели сендвичлар олиб келар, дубллар орасида у билан суҳбатлашар, танаффусларда эса унинг синглиси билан ўйнашдан завқланарди.
“Титаник” муваффақиятидан сўнг Алекс актриса бўлишни истайди, унга ҳатто агент ҳам топилади, аммо премерадан кейин уни кўчаларда таниб қолишган ва дастхат сўрашган бўлса-да, у юлдуз бўлолмади.
Коллеждан сўнг у Лос-Анжелесга кўчиб ўтиб, актёрлик курсларига ёзилади. Бугунги кунда Оуэнс-Сарно мухлислари билан мулоқот қиладиган блог юритади, шунингдек, скетч комедия ва импровизация жанрида ишлайди.
Изоҳ (0)