Голливуд юлдузлари орасида табиат муҳофазасига ўз ҳиссасини қўшадиганлари кўп. Кўплаб актёрлар, режиссёрлар, телебошловчилар глобал исиш ва бошқа экологик муаммоларни ҳал қилишда жуда фаолдир.
Леонардо Ди Каприо
“Титаник” кинокартинаси юлдузи Леонардо Ди Каприо Ер сайёрасининг экологик ҳимоячиларидан бири бўлиб, актёр томонидан амалга оширилган хайрия ишлари Жеймс Кемероннинг “Титаник” фильми билан бевосита боғлиқ. Ди Каприо ҳатто мазкур тадбирга бошқа кўплаб юлдузларни жалб қилган.
1998 йилда “Титаник” фильмини суратга олиш ишлари тугаганидан сўнг, актёр иқлим фалокатининг олдини олиш масалалари билан шуғулланадиган мутахассисларни жалб қилди ва ўзининг Global Green жамғармасини ташкил қилди. Бундан ўн йил аввал “Оскар” мукофотини топшириш маросимида Ди Каприо шундай деган эди:
“Иқлим ўзгариши муаммоси ҳақиқатдир. Бу барча тирик жонзотлар олдида турган энг долзарб таҳдид. Биз унга қарши биргаликда меҳнат қилишимиз ва иқлим ўзгаришини тўхтатишимиз керак”.
Жамғарма ёввойи табиат, денгиз флора ва фаунаси ҳамда қўриқланадиган ерлардаги маҳаллий аҳоли ҳуқуқларини ҳимоя қилиш бўйича лойиҳаларни молиялаштиради.
2021 йилда ребрендингдан сўнг жамғарма Re:wild деган номга ўзгартирилди ва Global Wildlife Conservation билан бирлаштирилди. Re:wild 50 та давлатда фаолият юритади, 120 га яқин турли лойиҳаларни қўллаб-қувватлайди ва 60 дан ортиқ компаниялар билан ҳамкорлик қилади. Шунингдек, 2022 йилда Ди Каприо халқаро иқлим фондига 45 миллион доллар маблағ ажратган.
Метт Деймон
Метт Деймон иқлим ўзгариши муаммосига 1980 йилларда Гватемалага сафаридан сўнг эътибор қаратди. Актёр маҳаллий аҳолининг аксарияти сувсиз яшаётгани, овқат пишира олмаслиги ва истаган пайтда чанқоқни қондира олмаслигига ўз кўзлари билан гувоҳ бўлди. Бундан бир неча йил ўтгач, у қишлоқ аҳолисига ёрдам бериш учун Замбияга кўнгилли равишда келди. Деймон 2006 йилда H20 Africa foundation жамғармасига асос солди.
“Сувдан фойдаланиш имкони бу — таълим олиш, меҳнат қилиш ва энг муҳими, оилаларимиз ва бутун инсоният учун келажак сари имкониятдир”, деб ёзади актёр.
Ташкилот кейинчалик бутун дунё бўйлаб сув танқислигига учраган одамларга ёрдам бериш учун Water Partners компанияси билан ҳамкорлик қила бошлади.
Шейлин Вудли
“Уруш ва тинчлик” сериали, “Ferrari”, “Юлдузлар айбдор”, “Дивергент” ва бошқа фильмлардаги роллари билан танилган актриса болалигиданоқ сайёрамизни ҳимоя қилиш масаласига бефарқ бўлмаган. У Калифорнияда ўқиб юрган мактабида турли чиқиндиларни алоҳида идишларга йиғишни жорий қилган. Шейлин табиатни асрашга бўлган иштиёқини болаликда кўрган воқеа билан изоҳлайди:
“Мен Коста-Рикадаги амаким уйига ташриф буюрдим, у ерда амаким қизи билан ўрмон бўйлаб кўп сайр қилдим ва ажойиб ҳайвонот оламини кузатдим. Бир куни мен “Аватар” фильмидагига ўхшаш катта ва улуғвор дарахтга дуч келдим. Бундай гўзал манзара мени таажжубга солган эди”, деб эслайди актриса.
Вудли Американинг туб аҳолиси анъаналарини қўллаб-қувватлайди ва кимёвий дорилар ўрнига гиёҳ ва ўсимликлар билан ўзини даволайди, аввал ишлатилган кийимларни сотиб олади ва фақат маҳаллий таомларни истеъмол қилади.
Бонг Жун Хо
“Паразитлар” триллери учун тўртта “Оскар”ни қўлга киритган режиссёр Бонг Жун Хо ватани Жанубий Кореяда нафақат ижодий, балки атроф-муҳитни муҳофаза қилиш ташаббуслари билан ҳам танилган. Режиссёр ўз фильмларида кўпинча экология мавзусини, ҳайвонларни етиштириш саноати ва иқлим ўзгариши муаммосини илгари суради. Бундан ташқари, режиссёр барқарор ривожланиш тамойиллари асосида экологик тоза усулда ишлаб чиқаришни тарғиб қилувчи фильмларни суратга олади.
“Иқлим ўзгариши нафақат келажакдаги одамлар учун, балки ҳозирда биз учун энг глобал муаммодир”, дейди Жун Хо.
Жун Хонинг 2006 йилда суратга олинган “Динозаврлар ҳужуми” фильми биологик қуроллар муаммосига бағишланган, 2017 йилда ишланган “Окча” фильмида фермалардаги ҳайвонларга нисбатан шафқатсиз муносабат тасвирланган, 2013 йилда суратга олинган “Қорлар аро” фильмида глобал иқлим ўзгариши ва унинг оқибатлари олдида бой ва камбағалларнинг тенглиги мавзуси ёритилган.
Марион Котиляр
Котиляр — атроф-муҳитни ҳимоя қилиш ишларида фаол эколог ва Greenpeace ташкилоти вакили. У 2005 йилда “Иқлим учун чизмалар" (Dessins pour le climat) лойиҳасида иштирок этди. Унда юлдузлар чизмалари савдоси бўлиб ўтди ва тушган маблағлар атроф-муҳит фаолларини қўллаб-қувватлашга йўналтирилди.
Актриса 2020 йилда бир нечта фаоллар билан бирга иқлим ўзгариши кўламини шахсан кўриш учун Арктикага йўл олди.
“Арктика бизга инсонлар томонидан тегилмаган жойдек кўринса-да, шундай олис макон ҳам инсон туфайли азият чекмоқда”, деди Котиляр.
Люк Бессон
2009 йилда режиссёр экологияга бағишланган кино ҳақидаги умумий тасаввурларни тубдан ўзгартирди. Фотосуратчи Ян Артюс-Бертран билан ҳамкорликда у бюджети 17 миллион доллар бўлган “Уй” номли ҳужжатли фильмини суратга олди. Экологик муаммолар ҳақидаги фильм 5 июнь — атроф-муҳитни муҳофаза қилиш кунида 87 та мамлакатнинг йирик платформаларида бепул намойиш этилди.
Фильмда Ернинг ажойиб манзаралари тақдим этилди ва инсоният гўзал табиат ва экотизимларга қанчалик салбий таъсир этаётгани тушунтирилди.
Изоҳ (0)