Пляж ва денгиз кўпчилик учун идеал дам олиш жойи ҳисобланади. Айниқса, пляж океан соҳилида жойлашган бўлса, бу таътил янада мароқлироқ бўлади. Океан қирғоғидаги дам олишнинг денгиздаги дам олишдан фарқини сўз билан ифодалаш қийин.
Ҳинд океани
Гоа, Ҳиндистон: Палолем соҳили
Гоа — Ҳиндистондаги бу манзилга бутун дунёдан ёшлар ташриф буюради. Палолем соҳили жаннатмакон бир гўша ва айни пайтда энг машҳур сайёҳлик йўналиши ҳисобланади. Гоанинг муҳити дам олишга жуда қулай. Бундан ташқари, нархлар жаҳон стандартларига кўра анча арзон.
Дам олиш учун энг қулай вақт: октябрдан мартгача.
Малдив ороллари: Банян Три, Какао ороли, Ника ва Сонева пляжлари
Малдив оролларига борган сайёҳлар Ҳинд океанидаги юзга яқин кимсасиз кичик оролчаларнинг бирида ҳордиқ чиқариш имкониятига эга бўлади. Бу жойлар нафақат ажойиб пляжлари билан, балки океан сувларида снорклинг ва ғаввослик қилиш учун ғоят қулай шароитлари билан ҳам машҳурдир.
Бу ерда ҳеч қандай маданий-тарихий диққатга сазовор жойлар йўқ, лекин бу жойлар тинч ёки романтик дам олиш учун жуда қулай. Шуни таъкидлаш жоизки, Малдив оролларида ярим яланғоч ёки бутунлай яланғоч ҳолда қуёшда тобланиш қатъиян ман этилган.
Дам олиш учун энг яхши вақт: ноябрдан апрелгача.
Маврикий: Флик эн Флак, Тру о Биш ва Паради пляжлари
Маврикий соҳиллари маржон қоялари ва ҳашаматли меҳмонхоналари билан машҳур. Оролни ҳар томондан маржон рифлари ўраб туради, шу боис пляж яқинидаги сув доимо тиниқ ва сокин бўлиб, ғаввослик ва яхталарда сайр қилиш учун ажойиб шароит яратади.
Дам олиш учун энг яхши вақт: апрель май ва сентябрдан декабргача.
Дайвинг учун энг яхши вақт: декабрдан мартгача.
Сёрфинг учун энг яхши вақт: июндан августгача.
Сейшел ороллари: Ансе Волберт ва Праслин пляжлари
Сейшел оролларининг ажойиб қирғоқлари майда тоза қум билан қопланган, Ҳинд океанининг сокин сувлари билан ювилиб туради, гранит қоялар ва сершох така-мак дарахтлари билан ўралган. Деярли барча меҳмонхоналар оилавий дам олишга мўлжалланган кичик хусусий пансионатлардир.
Виндсёрфинг ва яхта учиш учун энг яхши вақт: майдан октябргача.
Дайвинг учун энг яхши вақт: мартдан майгача ва сентябрдан ноябргача.
Атлантика океани
Алгарве, Португалия: Илҳа де Тавира, Албуфеира ва Лагос пляжлари
Португалиянинг Атлантика қирғоқлари бир томондан океан сувлари билан ювилса, бошқа томондан порт шаҳарлар шовқини билан ўралган. Баъзи жойларда нисбатан арзон меҳмонхоналарни учратиш мумкин.
Дам олиш учун энг қулай вақт: майдан октябргача.
Канар ороллари: Ла Гомера пляжи
Гомер ороли кўплаб Канар оролларидан, жумладан, машҳур Тенерифедан фарқланади. У гўё мукаммал сокинлик бахш этувчи дам олиш учун яратилгандек. Сайёҳлар бу ерга фақатгина цивилизациядан узоқда, вулқоннинг қорамтир қуми ёйилган океан соҳилида ҳордиқ чиқариш учун келишади.
Дам олиш учун энг яхши вақт: ноябрдан майгача.
Сёрферлар, айниқса, Гуинчо ва Эрикеира қирғоқларини маъқуллашади, бу ерда шамол ва тўлқинлар деярли йил давомида фаол дам олиш учун ажойиб шароит яратади.
ЖАР: Атлантика океани соҳилидаги пляжлар
Жанубий Африка Республикасининг бутун Атлантика океани қирғоқлари бўйлаб ҳар йили минглаб сайёҳлар ҳордиқ чиқарадиган қумли пляжлар чўзилган. Энг машҳур дам олиш жойларидан бири Франциянинг жанубини эсга соладиган Кейптаун пляжидир.
Дам олувчиларни сояли палмалар ўраб туради, пикниклар учун жуда қулай бўлган кўплаб майсалар ўсади, қирғоқ бўйлаб эса турли-туман ресторан ва барлар жойлашган. Бу ердаги қум оч тусда, сув мовий рангда, шабада эса тоза ва ёқимли.
Дам олишнинг энг яхши вақти: октябрдан мартгача.
Тинч океани
Фижи: Ясава пляжи
Ясава — Фижи таркибига кирувчи кичик ороллар занжиридир. Маржон қумларининг ажойиб гўзаллиги тиниқ мовий сув фонида яққол кўзга ташланади. Голливуд фильмлари ёки реклама роликларига экзотик манзаралар керак бўлганда, режиссёрлар кўпинча айнан шу жойларни танлашади.
Бу ерда дам олиш анча қимматга тушади, чунки Фижининг асосий ороли Надидан самолётда учиб бориш ёки яхтада сузиб етиб бориш талаб этилади. Айтишларича, Ясавада дам олишдан олинган таассуротлар камида 8 ой давомида ўз янгилигини йўқотмас экан, чунки сочлардаги қумни ювиб ташлаш учун айнан шунча вақт керак бўлади.
Дам олиш учун энг қулай вақт: майдан октябргача.
Бора Бора, Француз Полинезияси: Матира пляжи
Бора Бора Тинч океанидаги энг зўр ва айни пайтда энг қиммат пляжлар жойлашган маскан ҳисобланади. Матира пляжи атрофидаги лагуна маржон рифлари билан ўралган, шу сабабли кўрфаздаги сув доимо тинч ва жуда илиқ бўлади. Бора Борада дам олиш фақат пляжда ўтказилади - бу ерда ҳеч қандай саёҳатлар ва диққатга сазовор жойлар йўқ.
Дам олиш учун энг қулай вақт: майдан октябргача, лекин ёз охирида бу ерда одамлар жуда кўпайиб кетади.
Палау: Тhе Rock Islands соҳиллари
Палау манзаралари сувдан бўй чўзган улкан харсангтошлар ва маржон рифлари билан сайёҳларни лол қолдиради. Бу ердаги сув йил давомида етарлича илиқ, сувости олами эса ўсимлик ва ҳайвонот дунёсининг ноёблиги билан ажралиб туради. Кўплаб ғаввослар учун Тhе Rock Islands’га ташриф буюриш - ҳар қандай нарх эвазига рўёбга чиқаришга интиладиган ёрқин орзудир. Ҳақиқий медузалар салтанатини Мечерчар оролининг қоқ марказида жойлашган Meduzaлар кўлида кузатиш мумкин.
Дам олиш учун энг яхши вақт: февраль март.
Изоҳ (0)