Эгизак қаҳрамонларни битта актёр ўйнаган энг яхши фильм ва телесериаллар (фото)

Фильмларда томошабинларни ишонтира оладиган даражада рол ижро этиш осон эмас. Бир актёрнинг икки ёки ундан кўп образни яратиши ундан ҳам машаққатли жараён. Қуйида Голливуд юлдузлари эгизакларни гавдалантирган энг яхши фильм ва сериаллар ҳақида сўз боради. 

Марк Руффало — “Мен буни ҳақиқатлигини биламан”

​ “Мен буни ҳақиқатлигини биламан” мини-сериали эгизак ака-ука Доминик ва Томас ҳақида ҳикоя қилади. Шизофрения билан оғриган укаси туфайли Доминикнинг ҳаёти унчалик яхши кечмайди. Аммо Доминик Томасни психиатрия шифохонасида бўлишини хоҳламайди, шунинг учун у ердан олиб чиқиш йўлини топишга ҳаракат қилади.

Аслида, тамоман тескари характердаги икки ака-ука ролини ўйнаш учун Марк аввалига бир неча килога озади, 16 ҳафта давомида Доминик иштирок этадиган барча саҳналар суратга олинади. Кичик танаффусдан сўнг йўқотган вазнига қайтган Руффало Томас ролини ўйнайди.

Том Харди — “Афсона”

“Афсона” реал ҳаётдаги ака-ука Крейлар ҳақида ҳикоя қилади. Режи Крей Лондон жиноят оламининг бир қисмини назорат қилувчи жиноятчи. У параноик шизофрения билан оғриган акаси Роналдни руҳий касалхонадан олиб чиқади.

Марк Руффалодан фарқли ўлароқ, Том ака-ука ролини бирваракайига кетма-кет ўйнаган.

Арми Ҳаммер — “Ижтимоий тармоқ”

Гарвард талабаси Марк Цукерберг талаба қизларнинг жозибадорлигини баҳолаш учун дастур яратади ва шундан сўнг эгизак ака-ука Уинклвосслардан бутун бошли ижтимоий тармоқ яратиш таклифини олади. Марк бу таклифга рози бўлади, лекин вақт ўтиши билан ишни орқага сура бошлайди. Маълум бўлишича, Марк ака-укаларнинг ғоясини ўғирлаб, ижтимоий тармоқни ўзи яратмоқчи бўлади.

Дастлаб режиссёр Дэвид Финчер ҳақиқий эгизак актёрларни топмоқчи бўлади, бироқ у буни уддалай олмайди ва у Арми Ҳаммер ролини ўйнашга, шунингдек, суратга олиш ишларига модел Жош Пенсни чақиришга қарор қилади. Жош ука ролини ўйнайди, аммо пост-продюсерликда унинг юзи Ҳаммернинг юзига алмаштирилади. Арми ва Жошнинг ҳаракатлари синхронлаштирилишини таъминлаш учун улар 10 ой давомида машқ қилади. Шу билан бирга, баъзи саҳналарда Финчер анъанавий суратга олиш усулига мурожаат қилган, у Арми Ҳаммерни ака сифатида, кейин ука сифатида суратга олган ва кейин иккита саҳнани бирлаштирган.

Леонардо Ди Каприо — “Темир ниқобли одам”

Леонардо Ди Каприо “Титаник“ фильмида рол ўйнашидан олдин ҳам ажойиб образлар яратган. Лекин кўпчилик Лео қирол Людовик XIV ва унинг эгизак укаси Филипп ролини ўйнаган “Темир ниқобли одам”ни унутади.

Ҳикояда д’Артанян ва уч мушкетёр бир-биридан алоҳида ҳаёт кечиради, аммо д’Артаняндан ташқари уларнинг барчасини темир ниқобли маҳбус қиролнинг сирли укаси эканлиги ҳақидаги хабар бирлаштиради. Мушкетёрлар Людовик ўрнига Филиппни тахтга ўтқизмоқчи бўлади.

Линдси Лоҳан — “Ота-оналар учун тузоқ”

Фильм ижодкорлари ҳақиқий эгизаклар ўрнига ёш актриса Линдси Лоҳанни танлаб, унга бир вақтнинг ўзида иккита образни ижро эттириб фильм суратга олишади. Лоҳан учун иш осон кечмайди, чунки бу унинг катта фильмдаги дебюти эди. Шу сабаб қиз қийналмаслиги учун маълум бир саҳнани суратга олиш пайтида эгизагининг гаплари қулоқчин орқали айтиб турилган.

Пол Рудд — “Ўзинг билан тил топишиш”

Агентликда копирайтер бўлиб ишлайдиган Майлз Эллиот ҳаётидан мамнун эмас, шу сабаб клонини яратиш бўйича тажрибага рози бўлади. Шунга қарамай, иккинчи Майлз Эллиотнинг пайдо бўлиши оригинали учун ҳақиқий сюрпризга айланади. Клонидан фойдаланишни бошлаган Майлз унинг ҳамма нарсани ўзидан яхшироқ қилишини ва ҳатто ундан яхшироқ турмуш ўртоққа айланганини тушунади.