Ўзларининг актёрлик фаолиятидан ташқари инсонийлик жиҳатлари, эзгу ишлари ҳамда тавозеси билан дунё бўйлаб миллионлаб мухлислар, шу жумладан, нуфузли қироллик оилалари қалбидан жой олган Голливуд олами юлдузларини кўриб чиқамиз.
Леонардо Ди Каприо ва Монако шаҳзодаси Алберт II
Леонардо Ди Каприо нафақат ўзининг актёрлик маҳорати, балки экотизимга бефарқ эмаслиги билан ҳам танилган. Шу сабабли актёр табиатни асраш бўйича фаол бўлган Монако шаҳзодаси Алберт II билан мустаҳкам дўстона муносабатлар ўрнатган. 2015 йилда Ди Каприо атроф-муҳитни муҳофаза қилишга қўшган ҳиссаси учун шаҳзода томонидан медал билан мукофотланган.
2021 йилда Леонардо Ди Каприо ўзининг атроф-муҳитни муҳофаза қилиш фонди учун тантанали кечки зиёфат уюштирди. Унда Ирина Шейк, Кейт Ҳьюдсон, Нина Добрев, Орландо Блум каби машҳурлар, жумладан, Монако шаҳзодаси ва унинг рафиқаси иштирок этди. Кимошди савдосида Алберт II билан тўрт кунлик Арктика бўйлаб экспедиция, Элтон Жоннинг индивидуал концерти ва “Титаник” фильмидаги қутқарув кўйлаги учун рақобат бўлиб ўтди. Тадбир давомида 40 миллион доллардан ортиқ маблағ йиғилди.
Николь Кидман ва қиролича Рания
“Момақалдироқ кунлари” фильми юлдузи Николь Кидман нафақат томошабинлар ва ҳамкасбларни, балки қироллик оиласини ҳам латофати билан мафтун қилган. У нафислик намунаси бўлган Иордания қироличаси Рания ал-Абдуллоҳ билан яқин дўстдир. Икки гўзал аёллар ҳуқуқларини қўллаб-қувватлаш учун ўтказилган хайрия кечасида танишиб қолишди. Улар бугунги кунгача мулоқот қилишда давом этмоқда. Қироличанинг ўзи Николь Кидман ҳақида доим илиқ фикрлар билдиради ҳамда унинг меҳрибонлиги ва соддадил қалби ўзига жалб қилганини эътироф этади.
Том Ҳарди ва шаҳзода Гарри
Том Ҳарди шаҳзода Гарри билан узоқ йиллик дўст бўлиб, улар айнан қачондан бери таниш эканлиги номаълум. Кўпчилик улар “Юлдузлар жанги”нинг саккизинчи эпизодида танишган, деб тахмин қилади. Том Ҳарди ҳатто шаҳзода Гарри ва Меган Марклнинг тўйига таклиф қилинган. Маросимда актёр рафиқаси, актриса Шарлотта Райли билан бирга ташриф буюрган.
Риз Уизерспун ва Кейт Миддлтон
Актриса Риз Уизерспун Кейт Миддлтон билан илк бор 2011 йилда Лос Анжелесда танишган. Маликанинг ўзи актрисага учрашиш таклифини берган. Қиролллик оиласи билан учрашувга таклиф этилган кун Уизерспун тинч ухлай олмайди ва эрталаб соат 4 да учрашувга жиддий тайёргарлик кўради. У ва Кейт Миддлтон кўришган кун ажойиб ўтди ва икки аёл ўртасида дўстона муносабат ўрнатилди. Риз ўғлининг туғилган кунида Кейт Миддлтон алоҳида совға ҳам юборди.
Том Ҳэнкс ва малика Диана
Малика Диана барча учун Леди Ди номи билан таниш бўлиб, қироллик оиласининг энг кўзга кўринган вакилларидан саналган. У хайрия ишларида фаол иштирок этган ва маликанинг гўзал одоби ва табиати минглаб инсонлар ҳурмат ва эътиборига сабаб бўлган. У Майкл Жексон, Фредди Меркюри ва Том Ҳэнкс билан дўст бўлган. Улар биринчи марта 1995 йилда Лондонда бўлиб ўтган “Аполлон 13” фильмининг премьерасида учрашишган.
Анжелина Жоли ва герцогиня Камилла
Анжелина Жоли хайрия ишларида фаол иштирок этади ва БМТнинг эзгу ният элчиси ҳисобланади. У инсонпарварлик ёрдамини тарғиб қилиш учун иссиқ ўлкаларга бир неча бор ташриф буюрган, хайрия фондлари ташкил қилган. Бундай тадбирлар нуфузли қироллик оиласи билан дўстлик риштасини боғлаш учун яхши имконият бўлди. Анжелина герцогиня Камилла Паркер-Боулз билан яқиндан танишди. Маълумотларга кўра, актриса Корноулга кўчиб кетиш ва Лордлар палатасига аъзо бўлиш ниятида.
Изоҳ (0)