Hindistonda uch yil mobaynida kvartirasidan chiqmagan erkak axlat va chiqindilar uyumi orasidan topildi. Bu haqida The Indian Express xabar bermoqda.
Ma’lum qilinishicha, Social and Evangelical Association for Love (SEAL) xayriya tashkilotining ijtimoiy xodimlari yordam berish maqsadida yillar davomida butunlay yolg‘iz yashagan 55 yoshli sobiq dasturchi Anup Kumar Nairning Mumbaydagi xonadoniga borishgan. Tashrif davomida erkak juda ayanchli ahvolda — axlat, ishlatilgan oziq-ovqat qadoqlari, singan mebellar va iflosliklar orasida yashayotgani ma’lum bo‘ldi.
Ta’kidlanishicha, Nair chuqur tushkunlikka tushgan va yaqinlarini yo‘qotish tufayli ruhiy jarohat olgan. Shundan so‘ng u asta-sekin jamiyatdan uzoqlashib, hatto qarindoshlari bilan ham aloqani uzib qo‘ygan. So‘nggi uch yil davomida u onlayn ilovalar orqali buyurtma berish yo‘li bilan oziq-ovqat yetkazib berish xizmati tufayli tirik qolgan. Shuningdek, uning oyog‘ida zudlik bilan davolanishni talab qiladigan jiddiy infeksiya borligi aniqlangan.
Hozirda Nair vaqtincha xayriya tashkilotida istiqomat qilmoqda. Uning aytishicha, do‘stlari yo‘q, sog‘lig‘ining yomonligi esa yangi ish qidirishga imkon bermayapti.
“Biz bir necha bor unga kvartirasini tozalashda yordam berishga urinib ko‘rdik. Shuningdek, ota-onasining bank omonatidagi mablag‘ni uning shaxsiy hisob raqamiga o‘tkazishga ko‘maklashdik”, deydi Nairning qo‘shnisi.
Izoh (0)