O‘zbekiston Superligasining 19-turidan o‘rin olgan bahsni Namanganning “Navbahor” jamoasi o‘z maydonida Farg‘onaning “Neftchi” klubiga qarshi o‘tkazdi. Mazkur o‘yin “vodiy derbisi” bo‘lishi bilan birga prinsipial ahamiyatga ega edi. Boisi, har ikki klub tarkibidagi ko‘plab futbolchilar sobiq jamoalariga qarshi maydonga tushdi. Shuningdek, ushbu jamoalar joriy mavsumda sovrindorlar safidan joy olish uchun kurash olib borishayotgani bois mazkur o‘yinga qiziqish yuqori bo‘ldi.

Ilk daqiqalardan keskin kurashlar ostida boshlangan o‘yinda hisobni ochish Vitaliy Levchenko shogirdlariga nasib etdi. Bellashuvning 33-daqiqasida “Neftchi”ning qirg‘izistonlik hujumchisi Joel Kojo chap qanotdan oshirgan to‘pni Ikrom Aliboyev 20 metrlar chamasi uzoqlikdan kuchli zarba bilan darvozaga yo‘lladi.
Bu vaziyatda “lochinlar” darvozaboni Shukron Yo‘ldoshev xavfni bartaraf etadigandek tuyulgandi. Ammo to‘p uning qo‘liga tegib, darvoza to‘ridan joy oldi – 0:1. Natijada farg‘onaliklar tanaffusga kichik hisobdagi ustunlik bilan chiqib ketdi.
Mezbonlar ikkinchi bo‘limda muvozanatni tiklash, mehmonlar esa hisobdagi farqni oshirishga intildi. Ammo har ikki jamoa futbolchilarining hujumlari yakuniga yetmadi va yagona gol uchrashuv taqdirini hal qildi. “Neftchi” ko‘p yillik tanaffusdan so‘ng Namanganda g‘alaba qozonishga muvaffaq bo‘ldi.
“Daryo” “Navbahor” va “Neftchi” o‘rtasidagi o‘yindan fotogalereya tayyorladi.




















Izoh (0)