Angliya futbol klubi “Manchester Siti” O‘zbekistondan yana bir futbolchisini xarid qiladi. Bundan tashqari, klubga egalik qiluvchi “City Football Group” holding O‘zbekiston klubini sotib oladi. Bu haqda “Matbuot va ommaviy axborot vositalari kuni” munosabati bilan Markaziy Olimpiya Qo‘mitasida (MOQ) o‘tkazilgan tadbirda so‘zga chiqqan qo‘mita raisining birinchi o‘rinbosari Otabek Umarov ma’lum qildi.
Uning so‘zlariga ko‘ra, Abduqodir Husanovning transferi ortidan o‘zbek futboliga qiziqish oshgan va ayni paytda “City Football Group” klublaridan birini o‘z tarkibiga qo‘shish bo‘yicha muzokaralar olib borilmoqda.
Futbolchimiz Abduqodir Husanov “Manchester Siti”ga o‘tganidan keyin uning muxlislari 100 milliontaga ko‘paydi. Bu esa shuni anglatadiki, O‘zbekistonda taxminan 37-38 million aholi bo‘lsa, O‘rta Osiyoning boshqa davlatlari ham aynan ushbu futbolchi sabab “Manchester Siti” jamoasini doimiy ravishda kuzatadigan muxlislar qatoriga qo‘shildi. Hozir ular yana futbolchimiz va O‘zbekistonning yana bir jamoasini holting tarkibiga qo‘shib olishni rejalashtirmoqda, dedi MOQ raisining birinchi o‘rinbosari Otabek Umarov.
Ma’lumot uchun, Mansur Al Nahayonga tegishli “City Football Group” futbol holdingiga quyidagi jamoalar kiradi: “Baia” (Braziliya), “Lommel” (Belgiya), “Nyu-York Siti” (AQSh), “Melburn Siti” (Avstraliya), “Montevideo Siti Torke” (Urugvay), “Jirona” (Ispaniya), “Yokogama Marinos” (Yaponiya), “Trua” (Fransiya), “Mumbay Siti” (Hindiston), “Istanbul Bashakshehir” (Turkiya), “Manchester Siti” (Angliya) va “Chichuan Jyunyu” (Xitoy).
Shuningdek, hamkor klublar sifatida “Bolivar” (Boliviya) va “Palermo” (Italiya) jamoalari ham mavjud.
Izoh (0)