IT Park qanday qilib havaskor dasturchi o‘zining shaxsiy birja platformasini yaratgani, uning ishonchini suiiste’mol qilgan hindistonlik dasturchi, IT sohasida uzoqqa borish uchun jamoaning muhimligi haqida hikoya qildi.
Kamron Zaripov 2003-yil Qoraqalpog‘iston Respublikasi To‘rtko‘l tumanida tug‘ilgan. Hozirda 20 yosh. U dastlab 2018-yilda moliyaviy erkinlikka erishish maqsadida internet orqali sarmoyadorga aylanish uchun xorij platformalari orqali investitsiya kiritgan.
Ammo ushbu platformalarning ishlash tizimi va daromad manbai qayerdan kelishini tushunib yetgach, dasturchi sifatida ish boshlagan.
Dasturchi bo‘lish uchun qaysi kurslarga borgansiz?
Dasturchi bo‘lish uchun maxsus kurslarga bormaganman. Asosan video ko‘rsatmalar orqali o‘rganar edim. Nima xohlayotganingizda qarab YouTube yoki boshqa obunali platformalardan videolarni ko‘rib maxsus kodlarni yodlashingiz yoki ko‘chirib olishingiz mumkin.
Shaxsiy tajribam davomida ma’lum davlat yoki xususiy tashkilotlarda ishlashni xohlamaganim uchun kurslarga bormadim. Ammo buni boshqalarga tavsiya bermayman.
Chunki hammada idrok va o‘zlashtirish darajasi har xil. Shundan kelib chiqib, aytishim mumkinki, IT Park, banklar, dasturiy ta’minot tizimi bilan ishlovchi xususiy kompaniyalar yoki ushbu sohaga aloqador boshqa tashkilotlarda ishga joylashish uchun albatta maxsus o‘quv kurslariga borish kerak.
Bunga sabab ishga kirayotganda sizga masalani yechish uchun videolarda mavjud kodlar yoki tayyor algoritmlardan foydalanishning imkoni bo‘lmaydi.
Hozirgacha o‘zim va xalqaro hamkorlar ishtirok etgan hamda muvaffaqiyatli yakunlangan loyihalar soni 25 dan ortiq. Shaxsan o‘zim muvaffaqiyatli yakunlagan loyihalarim soni 7 ta.
Hamkorlarning asosiy qismi Rossiya, Hindiston, Qozog‘iston kabi davlatlardan. Barcha sohalarda eng arzon ishchi kuchi Hindistonda mavjud.
Bitta loyihani to‘liq ishlab chiqish uchun shaxsan menda 3 kun vaqt ketadi. Ammo asl haqiqat quyidagicha: aksariyat dasturchilar deadline’lar aynan tugaydigan kunda ishni yakunlash uchun noutbuk oldiga o‘tiradi. Oldingi kunlar esa shunchaki boshlang‘ich algoritmlar bilan band bo‘ladi.
Daromadlar oqimi va muvaffaqiyatsizlik
IT sohasida ish olib borayotganimda daromadlarim o‘rtachadan yuqori edi. Mablag‘larning asosiy qismi shaxsiy ehtiyojlarim va ish qurollarimni yangilashga sarflaganman.
Dasturchi sirini dasturchi albatta biladi. Bu sohaning bir qora tomoni bor. U ham bo‘lsa sizga ishonch bildirgan va siz ishonch bildirgan mijozlar o‘rtasida yolg‘on oldi-berdining yuz berish ehtimoli yuqoriligidir.
Tajribamda bir holatga duch kelganman. Agar biror chet ellik hamkor bilan kelishuvga erishsam xizmatni to‘lash uchun o‘zim ishlab chiqqan platforma orqali yolg‘on to‘lovni amalga oshirar edim. Loyihani ko‘rib chiqqandan so‘ng, haqiqiy pullarni ishlab beruvchi hisobiga o‘tkazib berardim.
Ma’lum vaqt kelib fond bozorida savdo qilish uchun o‘zimga juda kerakli bo‘lgan tayyor platformani hindistonlik “dasturchi”dan sotib olmoqchi bo‘ldim.
Juda ham shoshilganim bois doim bajaradigan ishimni qilmadim va pullarni uning hisobiga o‘tkazib yubordim (summasini ochiqlashni xohlamadi). Hindistonlik shaxsni boshqa topa olmadim va katta miqdordagi mablag‘lar havoga uchib ketdi.
Ammo shunga qaramasdan yana ishlashda davom etdim va mablag‘larimni teng taqsimlagan holda “Sarmoya” deya nomlangan shaxsiy tokenni o‘zim yaratgan birja platformasiga(zevex.uz) joylashtirish ishlari bilan shug‘ullandim.
Keyinchalik UZEX Respublika Tovar-xomashyo birjasidan brokerlik faoliyatini amalga oshirish uchun litsenziya olishga muvaffaq bo‘ldim.
Hozirda birjadan talab yuqori bo‘lgan mahsulotlarni birlamchi qo‘llarga yetkazib bermoqdamiz.
Brokerlik kompaniyasi bo‘lgani uchun daromad solig‘i 25 foizni tashkil etadi. Har bir oldi-sotdini amalga oshirganda taqriban 50 dollar atrofida komissiya olamiz. Shuning hisobiga dasturchilikda oladigan daromadlarim miqdori ikki barobarga qisqardi.
IT sohasida jamoaviy ishlashning ahamiyati
Hozirda olib borayotgan faoliyatimni omadsizlik deya baholamayman. Ammo IT sohasida uzoqqa borish va har tomonlama o‘sish uchun jamoaning o‘rni juda ham muhim. Chunki yirik loyihalar doimo jamoa bilan birga bajariladi. Agar yakdil fikrga ega bo‘lmaganlar yig‘ilgan bo‘lsa jamoa darz ketishi aniq.
Bizda ham shunday bo‘ldi. Jamoamiz bilan birga ishladik. Ammo bajargan ishlarimiz faqatgina murakkab bo‘lmagan mobil ilovalar va o‘yinlar bilan cheklanib qoldi.
Biz tarqalib ketdik. Ayrimlar davlat idorasiga ayrimlar xususiy kompaniyalarda ishlashni boshladi. Shunday qilib IT sohasidagi sarguzashtlarim vaqtinchalik to‘xtab qoldi.
Ammo maqsadlarim qotib qolgani yo‘q. Yaqinda Yandex Games bilan shartnomaga kelishib, kichik hajmni va uncha murakkab bo‘lmagan o‘yinlarni saytga joylashtirish niyatidamiz.
Izoh (0)