Ba’zi ism-shariflar bor-ki, ular darhol butun bir davrni, musiqani, uslubni, raqslarni va hatto hind ziravorlarini eslatadi. Mitxun Chakraborti — aynan shunday inson. U 1950-yil 16-iyun kuni tug‘ilgan. Bu oddiy taqvim sanasi emas, balki hind kinosi ixlosmandlari uchun bir davrning boshlanish nuqtasidir. Maqolada aktyor haqida barcha qiziq ma’lumotlarni bilib olasiz.
Ilk yillar: Kalkuttadan Bollivud sari yo‘l
Asl ismi Gouranga bo‘lgan Mitxun Chakraborti, Hindistonning katta va gavjum shahri Kalkuttada tug‘ilgan. U oddiy oilada ulg‘aydi: otasi telefon kompaniyasida ishlagan, onasi esa uy bekasi edi. Oilada besh farzand bo‘lgan. Garchi ular oddiy yashashgan bo‘lsa-da, ota-onasi o‘g‘illarining kelajagidan katta umid qilgan — unga yaxshi ta’lim berib, hayotda yutuqlarga erishishini orzu qilgan.
Kalkuttaning gavjum bozorlari va qadimiy ibodatxonalari orasida ulg‘ayayotgan bola ko‘cha tomoshalaridan ilhomlanar, sahnaga chiqish qilishni orzu qilardi. Uning yoshlik yillari faqat teatr bilan emas, balki sport bilan ham to‘la edi. U ayniqsa kurash va yengil atletikaga qiziqardi.
Aktyorning hayotidagi burilish nuqtasi — Punedagi nufuzli Kino instituti edi. Aynan shu yerda uning iste’dodi namoyon bo‘ldi. U nafaqat yaxshi aktyor, balki butun zalni o‘z raqsi bilan ruhlantira oladigan inson edi. Aynan shu joziba va energiya uni keyinchalik Bollivud yulduziga aylantiradi.
Inqilobdan san’at sari
1960-yillarda yosh Mitxun radikal siyosiy harakat — naxalitlar safiga qo‘shildi. U korrupsiya va ijtimoiy adolatsizlikka qarshi kurashayotgan faol yoshlar qatorida edi, hatto 1967-yildagi mashhur qo‘zg‘olonda ham ishtirok etgan.
Ammo hayot unga og‘ir saboq berdi. Yagona akasining fojiali o‘limi Mitxunni chuqur o‘ylashga majbur qildi. Vaqt o‘tib, u radikal harakatlardan butunlay voz kechdi va oilasi bag‘riga qaytdi. Shundan so‘ng u o‘zining haqiqiy yo‘lini topdi — siyosatda emas, balki san’atda.
Yulduzlik sari ilk qadam: “Disko qiroli” va birinchi shon-shuhrat
Mitxunning kino olamidagi birinchi katta muvaffaqiyati 1977-yilda suratga olingan “Qirollik ovchilari” dramasidan boshlandi. U filmdagi roli uchun santal qabilasi hayotini chuqur o‘rgandi, ularning urf-odatlarini bilib, hatto ovlarda ham qatnashdi. Bu ishtiyoq va mehnat o‘z samarasini berdi — film Hindistonning eng nufuzli mukofotlaridan biri “Oltin lotus”ni qo‘lga kiritdi. Mitxun esa “Eng yaxshi erkak” roli uchun Milliy kino mukofoti bilan taqdirlandi.
Ammo unga haqiqiy jahon shon-shuhratini 1982-yilda chiqqan “Disko raqqosi” filmi olib keldi. Bu film chinakkam fenomenga aylandi — Hindistondan tortib Afrikagacha, hatto Sovet Ittifoqigacha bo‘lgan tomoshabinlarni rom etdi. Sovet ayollari orasida millionlab muxlisalar charos ko‘zli, jozibali qahramonga oshiq bo‘lib qolishdi.
Mitxun Chakraborti disko raqslari, yorqin liboslar va cheksiz jozibadorlik davrining timsoliga va sovet tomoshabinlari uchun haqiqiy yulduzga aylandi.
Eng yaxshi rollar: dramadan jangarigacha
Mitxun Chakraborti o‘z faoliyati davomida 350 dan ortiq unutilmas obrazlarni yaratdi — har bir roli tomoshabinlar yodida qoldi. “Disko raqqosi” filmidagi ulkan muvaffaqiyatdan so‘ng u yana bir qator mashhur filmlar bilan muxlislarni xursand qildi: “Ona qasamyodi”, “Muhabbatni sindirib bo‘lmaydi”, “Komandos”, “O‘yna, o‘yna”, “Guru” va “Vardat” shular jumlasidan.
Uning filmografiyasida har xil obrazlar bor edi: kambag‘al yigitlardan tortib millionerlargacha, adolat uchun kurashuvchi qahramonlardan tortib uddaburon firibgarlargacha. Ammo ayniqsa u ijtimoiy adolatsizlik haqida bo‘lgan filmlarda o‘zini erkin tutardi. Bunday filmlarda uning qahramonlari odatda mustahkam iroda timsoliga aylanar, butun dunyo ularga qarshi bo‘lsa-da, ular kurashni hech qachon to‘xtatmas edi.
Chegarasiz mehribonlik
1990-yillarda taqdir Mitxun Chakraborti hayotini kutilmagan tomonga burdi. U gazeta sahifasidagi bir kichik xabarni ko‘rib qoldi. Unda og‘ir ahvoldagi chaqaloq G‘arbiy Bengalda chiqindi uyumidan topilgani haqida yozilgan edi. Ushbu voqea aktyor va uning rafiqasi Yogita Balining yuragiga chuqur ta’sir qildi.
Mashhurligi va tig‘iz kun tartibiga qaramay, ular bu holatga befarq bo‘lib turolmadi. Ular qizchani vasiylikka olishga qaror qildi. Shunday qilib, ularning oilasiga Dishani ismli qiz qo‘shildi va tez orada u uch nafar akasining erkatoy singlisiga aylandi.
Ko‘pchilik bilmagan hayratlanarli faktlar
🎬 Mitxun Chakraborti aslida olimpiya chempioni bo‘lishi mumkin edi — sportdagi faoliyati juda yaxshi boshlangan, ayniqsa kurashda. Ammo og‘ir jarohat uning rejalarini butunlay o‘zgartirib yubordi.
🎬 Biroq taqdir unga kino olami “toji”ni berdi. U Hindistonning turli tillarida suratga olingan filmlarda birday muvaffaqiyatli rol o‘ynagan kam sonli aktyorlardan. Hindi, bengal va telugu tillaridagi rollari tomoshabinlar yuragiga yetib borgan.
🎬 Mitxun hayvonlar uchun boshpanalar tashkil qilgan va ko‘plab xayriya loyihalarida faol qatnashgan. U shu bilan shon-shuhrat insonni o‘zgartirmasligini isbotlaydi.
🎬 U, shuningdek, muvaffaqiyatli tadbirkor va siyosatchi hamdir — mehmonxona va restoranlar tarmog‘i egasi, Hindiston parlamentining yuqori palatasi — Rajya Sabxaning sobiq a’zosi.
Mukofotlar va e’tirof
Mitxun Chakrabortiga mukofotlar go‘yoki osmondan yog‘ilgandek edi. U uch marta Hindiston Milliy kino mukofotini “Eng yaxshi erkak roli” uchun qo‘lga kiritgan. Ammo uning eng yuksak e’tirofi bu “Padma Bxushan” ordeni, Hindiston fuqarolari uchun eng oliy davlat mukofotlaridan biri edi. Bu faxrli unvon faqat eng munosiblarga beriladi.
Mitxun Chakrabortining qizi Dishani ham katta akasi Mimox singari Nyu Yorkda ta’lim oldi va hozirda aktyorlik sohasida o‘zini sinab ko‘rmoqda. Chakraborti oilasi bu chinakam ijodiy sulola. Ular uchun kino shunchaki kasb emas, balki butun hayot tarziga aylangan oilaviy merosdir.
Bugungi kunda Mitxun Chakraborti hanuz faol ijod qilmoqda. U kinoda rol o‘ynamoqda, biznes bilan shug‘ullanmoqda, xayriya ishlari bilan ham band. Uning filmlari hanuz tomosha qilinadi, raqslari ijtimoiy tarmoqlarda qayta-qayta ko‘riladi, hayot yo‘li esa orzu qilganlar uchun ilhom manbai bo‘lib qolmoqda.
Kimliging yoki qayerdan ekaning muhim emas. Muhimi — kim bo‘lishni xohlayotganing, deydi Mitxun Chakraborti
Uning hayoti millionlab yoshlarga hech qachon taslim bo‘lmaslikni ko‘rsatadi.
Izoh (0)