Namangan viloyatida bir kunda 12 ta IT-School o‘quv maktabi ochildi. Bu haqda “Daryo” muxbiri Azizbek Abduvaliyev xabar bermoqda.
“Bir million dasturchi” loyihasi ijrosi doirasida barcha shahar-tumanlardagi 12 ta kasb-hunar kolleji binosida tashkil maktablar mebellar to‘plami, kompyuter va orgtexnika qurilmalari bilan jihozlandi.
Ushbu markazlarni “Namangan tajribasi” sifatida respublika IT-Park (Raqamli texnologiyalar o‘quv markazi) bilan birlashtirish yuzasidan viloyat hokimligi hamda Axborot texnologiyalari va kommunikatsiyalarni rivojlantirish vazirligi o‘rtasida qo‘shma qaror qabul qilingandi. Mazkur kelishuvga asosan markazlar respublika boshqaruviga o‘tkazilib, IT-Park viloyatdagi har bir o‘quv markaziga 5-6 nafardan, jami 72 nafar murabbiyni ishga olishni boshladi. O‘qitish Hindiston bilan hamkorlikda ishlab chiqilgan uslubda tashkil etiladi.
O‘quv markazlarida yiliga 10 ming nafardan ortiq yoshlar o‘qitilib, ularga tegishli sertifikat taqdim qilinadi. Kurslarni muvaffaqiyatli yakunlagan tinglovchilar IT-Park Namangan filialiga frilanser va rezident sifatida qabul qilinadi.
Namangan shahridagi IT-School o‘quv markazida o‘tkazilgan taqdimot marosimida viloyat hokimi Shavkatjon Abdurazzaqov, Axborot texnologiyalari va kommunikatsiyalarini rivojlantirish vazirining o‘rinbosari Jamshid Egamberdiyev, Respublika IT-Park markazi direktori Farhod Ibragimov axborot texnologiyalari yo‘nalishiga qiziquvchi yoshlar bilan muloqotda bo‘ldi, ularni qiziqtirgan savollarga javob berdilar. Ushbu muloqotga barcha shahar-tumanlardagi IT-School o‘quv markazlari video-aloqa orqali ulandi.
— Keyingi yillarda dunyo miqyosida “raqamli shahar” kotsepsiyasi ommalashmoqda. Shu tajribadan kelib chiqqan holda “Raqamli Namangan” tizimini joriy etishga kirishganmiz. Namangandagi axborot texnologiyalari maktablarini tamomlagan yoshlar bu jarayonda faol ishtirok etadi degan umiddaman, — dedi Shavkatjon Abdurazzaqov.
Ma’lumot uchun, o‘quv markazlaridagi mashg‘ulotlar davomida ma’lumotlarni tahlil qilish, android ilovalar, veb-ilovalar va dasturiy ta’minot ishlab chiqish bo‘yicha bilim beriladi. Boshlang‘ich o‘quv kurslari bepul, dasturlash va grafikani chuqur o‘rgatuvchi kurslar esa to‘lov asosida faoliyat olib boradi.
Izoh (0)