Isroil armiyasi G‘azoning “harbiy harakatlar olib boriluvchi” hududlaridan aholi anklav janubiga majburan ko‘chirilishini bildirdi. Bu qaror yahudiy davlati sektorni to‘liq nazoratga olish uchun yangi harbiy operatsiya boshlaganidan bir necha kun o‘tib ma’lum qilindi.
Isroil armiyasining arab tilida faoliyat ko‘rsatuvchi vakili Avixay Adray BMT va boshqa xalqaro gumanitar tashkilotlar ko‘chirilgan aholiga chodirlar yetkazib berishini aytdi. Biroq BMT hozircha bu rejaga izoh bermadi.
Binyamin Netanyaxu o‘tgan hafta harbiylarga al-Mavasi hududida jangovar harakatlarni kuchaytirishga buyruq berdi. Shundan so‘ng anklavga havodan va quruqlikdan hujumlar intensivlashdi. Jumladan, “gumanitar zona” deb e’lon qilingan Al-Mavasidagi qochqinlar lageriga zarbada Motasem al-Batta, uning rafiqasi va ikki yarim oylik qizi o‘ldirildi.
“Falastin Islomiy Jihod” tashkiloti Isroilning evakuatsiya qarorini “xalqaro qonunlarning ustidan ochiqcha kulish va G‘azoni egallash rejasi” deb atadi.
“Odamlarni ochlik, qatliom va majburiy ko‘chirish orqali qochishga majburlash – insoniyatga qarshi doimiy jinoyatdir”, deyiladi ularning bayonotida.
Urush boshlanganidan beri G‘azoda kamida 61 827 kishi o‘ldirilgan. Ularning 251 nafari ochlik qurboni bo‘lgan. Gumanitar vaziyat og‘irligiga qaramay, Isroil anklavga gumanitar yordam kirishini cheklab kelmoqda.
Izoh (0)