Pokistonda 28-iyun kuni avtomobil portlashi oqibatida 13 nafar harbiy halok bo‘lib, tinch aholi vakillari yaralandi. Bu haqda BBC xabar berdi.
Mamlakat rasmiylariga ko‘ra, hodisa Afg‘oniston bilan chegara yaqinidagi Shimoliy Vaziriston hududida yuz bergan. Xudkush terrorchi portlovchi moddalar bilan to‘ldirilgan mashinani harbiy karvonga qarab haydagan.
Pokiston hujum ortidagi jangarilar Hindiston tomonidan qo‘llab-quvvatlanganini da’vo qilgan. Ammo Hindiston Tashqi ishlar vazirligi matbuot kotibi Randhir Jaisval bu da’voni rad etgan.
Hujum uchun javobgarlikni Pokistonning “Hofiz Gul Bahodir” qurolli guruhining xudkush-terrorchi qanoti o‘z zimmasiga olgan. Pokiston armiyasi esa hujum Hindiston tomonidan qo‘llab-quvvatlangan jangarilar tomonidan amalga oshirilganini aytgan, ammo dalillar keltira olmagan.
“Ushbu fojiali va vahshiyona hodisada 3 nafar begunoh fuqaro, jumladan, 2 bola va bir ayol og‘ir jarohat oldi”, deyiladi Pokiston armiyasi bayonotida.
Pokiston bosh vaziri Shahboz Sharif bu hodisani “qo‘rqoqlik harakati” deb baholagan.
Izoh (0)