O‘zbekiston xalq artisti Og‘abek Sobirov san’atda o‘z o‘rnini topgan ijodkor hisoblanadi. Bu yil 53 yoshni qarshilagan xonandaning san’atga kirib kelishi, ayriliqlarga to‘la hayoti va ijodiy faoliyatiga nazar solamiz.
Og‘abek Sobirov 1972-yil, 24-iyun kuni Xorazm viloyati, Urganch shahrida, temiryo‘lchi Karim ota xonadonida dunyoga kelgan. Ilk musiqiy saboqlarni akasi Maqsud Sobirovdan olgan. 1978-yil 9-o‘rta maktabga, 1983-yilda 3-musiqa maktabiga o‘qishga kiradi. Musiqa maktabidan so‘ng Urganch shahrida joylashgan san’at kollejida tahsil olgan. Og‘abek Sobirov ko‘plab musiqiy tanlovlarda muvaffaqiyatli ishtirok etgan.
Filarmoniya binosidan AQSHgacha…
Ilk yakkaxon konsertini 21 yoshida Filarmoniya binosida taqdim qilgan xonandaning bu boradagi natijalari havas qilgulik. Og‘abek Sobirov poytaxtda 30 ga yaqin, viloyat va tumanlarda 200 dan ortiq yakkaxon konsertlar muallifi bo‘lgan.
Bundan tashqari AQSH, Germaniya, Fransiya, Belgiya, Kanada, Turkiya, Malayziya, Hindiston, Rossiya, Eron, Janubiy Koreya, Vengriya, Qozog‘iston, Qirg‘iziston, Tojikiston, BAA, Isroil, Xitoy, Turkmaniston davlatlarida bir necha martalab yakkaxon konsert dasturlarini taqdim etgan.
“ Unvonni avvalroq berish kerak edi, degan gapni eshitish katta baxt”
Davlat mukofotidan avval muxlislarning “Xorazm bulbuli” degan e’tirofiga muyassar bo‘lgan Og‘abek Sobirov O‘zbekistonda xizmat ko‘rsatgan artist unvoniga 2002-yilda, O‘zbekiston xalq artisti unvoniga esa 2020-yilda munosib ko‘rilgan.
— San’atkor uchun unvon “Avvalroq berilishi kerak edi” deyilgan gaplarni eshitishning o‘zi katta baxt. Masalan, “Iye, sizga ham berdimi? Tavba”, desa nima qilardim. Unda bu narsaning keragi bo‘lmasdi. Chunki u sharaf bo‘lmaydi. Odamlarning ko‘zida soxta san’atkor bo‘lib gavdalanib qolasiz.
Ijtimoiy tarmoqlar orqali, to‘ylarda, konsertlarda, xalqimizning yaxshi kunlarida odamlar bilan hamsuhbat bo‘lib qolamiz. Shu paytlarda birinchi beriladigan savol shu: “Nima uchun sizga O‘zbekiston xalq artisti unvoni berilmayapti?” Bu savollardan men to‘g‘ri ma’noda zavq olardim. Demak, shukrki, men xalqning nazarida ekanman. Keyin ham berilmasligi mumkin edi. Aslida, gap berilishi yoki berilmasligida ham emas, masalan, xalq yaxshi ko‘rsa, shuning o‘zi oliy unvon.
Endi “10 yil oldin, 15 yil oldin berilsa ham bo‘lardi” degan gaplar bo‘lyapti. Masalan, bu narsaga ko‘pchilik guvoh, ochiqdan ochiq yozishyapti. Bu narsalar san’atkor uchun ulkan baxt. Aytishadi-ku, har bir narsaning o‘z vaqt-soati bor, demak, vaqti bo‘lmagan. Men shunday tushunaman. Allohga behisob shukur. Yurtboshimizning kamtarona san’atimizga nazari tushganidan juda xursandman, deydi xonanda O‘zbekiston xalq artisti unvonini nisbatan kech olgani haqidagi gap-so‘zlarga nisbatan.
Prezidentning tilla otiga munosib ko‘rilgan xonanda
Odamlar orasida “Turkmaniston prezidenti Og‘abek Sobirovga tilla ot sovg‘a qilgani uchun uni davlat tadbirlariga qo‘yishmayapti”, degan gap-so‘zlarga xonanda bu uydirma, bo‘lmagan mish-mishlar deya munosabat bildirgan edi.
— Birovga yoqish-yoqmaslik hamma davrda ham bo‘lgan. Rostini aytsam, o‘sha paytda 15-16 yillar avval kimlarningdir she’rini aytishim kerak bo‘ldi. Shu she’r menga yoqmadi, tanamga singdirolmadim. Qo‘pol qilib aytganda, o‘sha she’rni qo‘shiq qilib aytgim kelmadi. Keyin bu qo‘shiq aytilmadi, shundan boshlandi bu ahvol.
Xalqimizning to‘ylarida ko‘p bo‘lamiz, bir-ikki kun qolganda tezda tadbirga yetib keling, degan davlat chaqiriqlari bo‘lib qoladi. Bormaslikning iloji yo‘q, lekin bu yerda to‘yga aytilganmiz, oylab kutgan odamlar bor, odamlar niyat qilishadi. Qancha harakat va orzu-niyatlar bilan qilinayotgan to‘yga bir kun qolganda “Borolmayman”, deb aytishni tasavvur qilib ko‘ring. Ularning o‘rniga o‘zingizni qo‘yib ko‘ring. Vijdonim qiynalardi, to‘yni tashlab, u yerga borolmasdim. Har kim har xil tushunishi mumkin. Birov “Pulni deb, ozgina mablag‘ ko‘ziga yaxshi ko‘rindi-yu, davlatning bepul tadbiri ko‘ziga ko‘rinmadi”, deyishi mumkin, lekin unaqa emas.
Har kimning sharoiti har xil. Kambag‘al odam niyat qiladi. Men borolmasam yuzimga aytadi: “Va’da berdingmi? To‘yning sanasini o‘zing belgiladingmi? So‘ragan pulingni berdimmi? Kelasan, tamom”, deydi. Xo‘sh, shu kabi vaziyatda nima deb javob qaytarish mumkin? Ushbu savolga hanuzgacha hech kimdan qoniqarli javob eshitmaganman. Shu narsalar asta-sekin mening davlat tadbirlaridan chetlashishimga sabab bo‘ldi deb o‘ylayman, deydi Og‘abek Sobirov.
AQSH dollarlaridan yasalgan “pulchambar”
Og‘abek Sobirov ellik yoshdan oshgan bo‘lsa-da, o‘zbek to‘ylaridagi eng talabgir xonanda. Muxlislari uni shunchalik yaxshi ko‘rishganidan AQSH dollarlaridan tayyorlangan “pulchambar”larni to‘ylarda uning bo‘yniga ilib qo‘yishadi.
Xonandaning ma’muri javobiga ko‘ra, bu holat Xorazm viloyatining Gurlan tumanida o‘tkazilgan sunnat to‘yida bo‘lgan. Og‘abek Sobirovning ashaddiy muxlisi bo‘lgan to‘y egasi xonandaning bo‘yniga 20 ta 1 dollarlik kupyuradan iborat “pulchambar” taqib qo‘ygan.
Ma’lumot uchun, “Xorazm bulbuli” Og‘abek Sobirov Xorazm to‘ylarida xizmat qilish narxi 3000 dollar etib belgilangan.
“Ikkinchi marta uylanganim rost, qaynsinglimga uylanganim esa yolg‘on”
Og‘abek Sobirovning hayoti ko‘pchilik o‘ylagandek faqat yutuqlar, g‘alabalardan iborat bo‘lmagan. U hayotidagi eng yomon hodisa ayolining o‘limi bo‘lganini aytadi.
— Ayolim olamdan o‘tgan, lekin mish-mishlar shu qadar avj olib ketdiki, qaynsinglisiga uylandi, degan gaplar tarqab ketdi. Ayolim qarindoshimiz, tog‘amning qizi bo‘lgan. Eslasam, boshqacha bo‘lib ketaman. Hayotda eng ezilgan davrim bo‘ldi, u paytlarni eslasam, o‘sha hayotga yana qaytgandek bo‘laman, yaram yangilanadi. Bu hayotda mening yuragimni jarohatlagan eng katta hodisa shu yo‘qotish bo‘ladi. Bunday taqdirni hech kimga hech qachon ravo ko‘rmayman, deydi Og‘abek Sobirov.
“Rahmatli ayolim xotirasiga film ishlaganmiz”
Og‘abek Sobirov o‘zini kino olamida ham sinab ko‘rgan. U aktyor sifatida “Qizg‘aldoq” nomli filmda bosh rolni ijro etadi. Ushbu film ham, film saundtreki ham juda ommalashgan.
— Oilamizdagi mudhish voqea, farzandlarimizning onasi olamdan o‘tgandan keyin uni bir umrga eslatib turadigan yodgorlik sifatida kino suratga olsak, degan maslahatlar bo‘lgan. Bu taklifni kutmagan edim. O‘ylab qarasam, bu ham savob, ibrat bo‘ladi. Mikoyil Sulaymonov film ssenariysini yozgan, Ibrohim Rasulov filmni suratga olgan. Bu film asosan real voqealarga asoslangan, deydi Og‘abek Sobirov.
“Otamning duolari sabab shifo topdim, o‘zlari esa olamdan o‘tdilar”
Og‘abek Sobirov dadasi u chalingan dardni Xudodan so‘rab, o‘ziga olganini xotirlaydi.
— San’atga endi kirib kelayotgan paytlarim 1991—92-yillar edi. Yotib qoldim, juda ham yomon paytlarni boshimdan o‘tkazdim. Balki menga ko‘z tegdimi, degan fikr ham yo‘q emasdi. Hozir ota bo‘lib o‘sha vaziyatimda ota-onamga qanchalar qiyin bo‘lganini bilyapman. Dunyoda hech bir ota-ona farzandining yomon holatini ko‘rmasin.
Dadam bizni shu darajada yaxshi ko‘rardilarki, bizni dunyoga ishonmas edilar. Uch-to‘rt oy yotib qolganimdan so‘ng, miyamda shamollash bo‘lib, meningit bo‘lib qoldim. Keyin yana to‘rt oy bu kasal bilan kurashdim, juda xavfli bo‘ldi. Deyarli bir yilga yaqin to‘shakda yotdim. Tashqariga chiqib, biror joyga bora olmasdim, ozib, o‘zimni taniy olmaydigan darajaga kelib qoldim, oynaga qaraganimda qo‘rqib ketardim.
Baribir ota — ota ekan-da. Otam ustimda turib Allohga nola qilganlar. “Bolamning dardini olib, menga bergin, bolam qiynalmasin”, deb. Buni o‘z qulog‘im bilan eshitganman. Dadam shu dardimni so‘rab, o‘zlariga olganlar. Shu voqeadan so‘ng kundan kunga yaxshi bo‘lib ketaverdim, dadam esa ikki yilga bormay vafot etdilar.
Dadam temiryo‘lchi bo‘lib ishlaganlar. Juda baquvvat inson edilar. Har kuni 30-40 km piyoda ishga borib kelardilar. Lekin shu voqeadan ko‘p o‘tmay olamdan o‘tganlar. Ba’zida biz otamizga mos farzand bo‘la oldikmikan, munosib bo‘lib, hurmatlarini joyiga qo‘ya oldikmikan, deb o‘ylab qolaman. Hozirgacha shu fikr menga tinchlik bermaydi, juda qiynalaman, deydi Og‘abek Sobirov otasining erta vafot etgani haqida.
Izoh (0)