Norvegiyaning yirik pensiya jamg‘armasi KLP Isroil harbiylariga uskunalar sotadigan 2 ta kompaniya bilan hamkorlikni to‘xtatishini ma’lum qildi. Bu haqda Al Jazeera xabar berdi.
Jamg‘armaga ko‘ra, AQSHning Oshkosh korporatsiyasi va Germaniyaning ThyssenKrupp sanoat firmasi tomonidan sotiladigan uskunalar G‘azodagi urushda ishlatilmoqda. Kompaniyalar asosan yuk mashinalari va harbiy transport vositalariga ixtisoslashgan.
“2024-yil iyun oyida BMT orqali bir nechta kompaniyalar Isroil armiyasiga qurol va uskunalar yetkazib berayotgani va bu qurollar G‘azoda qo‘llanilayotgani haqida xabar topdik. Xulosamiz shuki, Oshkosh va ThyssenKrupp kompaniyalari bizning investitsiya ko‘rsatmalarimizga zid ish tutmoqda”, dedi KLP vakili.
Jamg‘arma ma’lumotlariga ko‘ra, u 2025-yil iyunigacha Oshkosh’ga 1,8 million dollar va ThyssenKrupp’ga deyarli 1 million dollar sarmoya kiritgan.
1949-yilda tashkil etilgan va mamlakatdagi eng yirik pensiya jamg‘armasi bo‘lgan KLP taxminan 114 milliard dollarlik fondni nazorat qiladi. U munitsipalitetlar va davlat sektoridagi korxonalarga tegishli bo‘lgan davlat pensiya jamg‘armasi sanaladi. Unda asosan 900 000 ga yaqin munitsipal ishchilari qamrab olingan.
KLP qaror qabul qilishdan oldin ikkala kompaniyani ham ogohlantirgan. Oshkosh “G‘azoda Isroil armiyasi tomonidan foydalaniladigan uskunalarni, asosan transport vositalari va ehtiyot qismlarni sotganini va sotishda davom etayotganini” tasdiqlagan.
ThyssenKrupp Isroil armiyasi bilan uzoq muddatli aloqalari borligini tan olgan. Xususan, u 2020-yil noyabridan 2021-yil mayigacha bo‘lgan davrda Isroil dengiz flotiga Sa’ar 6 tipidagi 4 ta harbiy kema yetkazib bergan. Nemis kompaniyasi, shuningdek, 2025-yilning oxirida Isroil harbiy-dengiz kuchlariga suv osti kemasini yetkazib berishni rejalashtirmoqda.
Pensiya jamg‘armasi inson huquqlarini buzadigan kompaniyalar bilan biznesni tugatishi birinchi marta emas. U 2021-yilda 16 ta kompaniyadan, jumladan, telekommunikatsiya giganti Motorola’dan voz kechgandi. Uni jamg‘arma bosib olingan G‘arbiy Sohildagi noqonuniy Isroil aholi punktlari bilan aloqasi borlikda ayblagan. O‘sha yili KLP Myanma harbiy hukumati bilan aloqadorligi bois Adani Ports (Hindiston port va logistika guruhi) bilab ham aloqalarni uzgan.
Izoh (0)