Qo‘shma Shtatlarning respublikachilar boshqaruvidagi uchta shtati o‘z ixtiyoridagi Milliy gvardiya askarlarini Vashingtonga yuborishini e’lon qildi. Gap G‘arbiy Virjiniya, Janubiy Karolina va Ogayo haqida bormoqda.
Mazkur qaror prezident Donald Tramp ma’muriyatining poytaxtda jinoyatchilik va uysizlikka qarshi federal choralarni kuchaytirish tashabbusi doirasida qabul qilindi. Jumladan, G‘arbiy Virjiniya gubernatori Patrik Morrisey 300–400 nafar gvardiyachi Vashingtonga yuborilishini ma’lum qildi. Shuningdek, u federal hukumatning “poytaxtda tartib va osoyishtalikni tiklash” harakatini qo‘llab-quvvatlashini bildirdi.
Janubiy Karolina gubernatori Genri Makmaster esa 200 nafar askarni safarbar qilishga ruxsat berdi. Biroq ular tabiiy ofat sodir bo‘lgan taqdirda chaqirib olinishi mumkin. Ogayo gubernatori Mayk Devayn bu uchun 150 nafar harbiy politsiyani yuborilishini tasdiqladi.
Ular Pentagon topshirig‘iga binoan tez orada yetib kelishi kutilmoqda. Mazkur kontingent Kolumbiya okrugi Milliy gvardiyasining 800 nafar xodimi va federal huquq-tartibot idoralari bilan birgalikda jamoat tartibini saqlashi aytilmoqda.
Norozilik namoyishlari
Trampning qaroriga javoban poytaxtda norozilik namoyishlari bo‘lib o‘tdi. Ommaviy aksiya qatnashchilaridan biri Morgan Teylor Oq uyning jinoyatchilikni jilovlash va immigratsiya siyosatidan keskin norozi ekanini ma’lum qildi. Mahalliy aholi jinoyatchilik darajasi kamaygan bir vaqtda bunday choralarni “ortiqcha va asossiz” deb baholamoqda.
Tramp ma’muriyati Kolumbiya okrugida politsiya ustidan bevosita nazoratni kuchaytirishga intilmoqda. Prezidentning favqulodda farmoniga ko‘ra, mahalliy ma’muriyat “jamoat tartibini ta’minlay olmagani” uchun federal hukumat poytaxtda o‘z xodimlarini himoya qilish choralarini ko‘radi.
Biroq shahar rahbariyati va aholisi federal organlar vakolatlarining kengaytirilishini xavotir bilan qabul qildi. Jumladan poytaxt meri Myuriel Bouser “bu o‘zini-o‘zi boshqarish uchun eng katta sinov” ekanini ta’kidlab, Vashington aholisi “demokratiya uchun kurashda birlashishi zarurligi”ni ta’kidladi.
Izoh (0)