Bollivud aktrisasi va model Shefali Jarivala 42 yoshida vafot etdi. Bu haqda Indian Express gazetasi politsiyadagi manbalariga tayanib xabar berdi. Uning o‘limiga yurak to‘xtab qolishi sabab bo‘lgani aytilmoqda.
Qayd etilishicha, aktrisa kosmetolog qabulida yoshartiruvchi ukol olganidan so‘ng sog‘lig‘i yomonlashgan.
Dastlabki ma’lumotlarga ko‘ra, Jarivala 27-iyun kuni tushdan keyin bir necha yillardan beri muntazam olib kelayotgan yoshartiruvchi preparatni qabul qilgan. Kechasi Mumbaydagi kvartirasida uning qon bosimi keskin tushib ketgan va titroq boshlangan. Qarindoshlari aktrisani zudlik bilan kasalxonaga olib borishgan, u yerda shifokorlar aktrisaning o‘limini qayd etgan.
Ma’lum qilinishicha, Jarivala nevrologik kasallikdan aziyat chekkan va tegishli dori-darmonlarni qabul qilgan. Bundan tashqari, u vafot etgan kuni uyida diniy marosim (puja) o‘tkazgani uchun ro‘za tutgan, bu esa och qoringa qabul qilingan dorilarning salbiy ta’sirini kuchaytirishi mumkin edi.
Politsiya aktrisaning uyidagi dori-darmonlarni olib ketgan va baxtsiz hodisa tufayli o‘lim haqidagi xabarni qayd etgan. Tergov doirasida kamida sakkiz kishi, jumladan, uning eri, ota-onasi, xizmatkori va bino qo‘riqchisi bilan suhbatlashilgan. Toksikologik ekspertiza natijalari olingandan so‘ng yakuniy xulosalar chiqariladi.
Shefali Jarivala 2000-yillarning boshlarida butun Hindiston bo‘ylab hitga aylangan Kaanta Laga (hind tilidan tarjima qilingan “Tikanli ukol”) musiqiy videosi chiqqanidan keyin mashhurlikka erishdi. Keyinchalik u mashhur realiti-shoularda, jumladan, aktyor Salmon Xon tomonidan tashkil etilgan Bigg Boss 13 da ishtirok etdi.
Izoh (0)