AQSH prezidenti Donald Tramp boshlagan savdo urushlari xarajatlarning ko‘payishi va savdoning kamayishi tufayli jahon kompaniyalariga 34 milliard dollardan ortiq zarar yetkazdi. Bu haqda Reuters agentligi korporatsiyalar hisobotlari tahlili asosida o‘z hisob-kitoblariga tayangan holda xabar bermoqda.
“Prezident Donald Trampning savdo urushi kompaniyalarga yo‘qotilgan savdolar va oshgan xarajatlar ko‘rinishida 34 milliard dollardan ortiq zarar keltirdi. Tariflar bo‘yicha davom etayotgan noaniqlik dunyoning yirik kompaniyalarida qaror qabul qilish jarayonini izdan chiqarayotgani sababli bu summa yana oshishi kutilmoqda”, deyiladi xabarda.
Agentlik kompaniyalarning korporativ hisobotlarini tahlil qilgan. Unga ko‘ra, deyarli barcha yo‘qotishlar — 33 milliard dollar — birjalarda savdo qiluvchi yirik kompaniyalarning baholashlariga asoslangan. Ulardan 32 tasi AQSHda S&P 500 keng bozor indeksi hisobiga, uchtasi umumyevropa STOXX 600 indeksiga va 21 tasi Yaponiyaning Nikkei 225 indeksiga kiritilgan.
Hozirda kamida 42 ta kompaniya kelajakdagi daromadlar bo‘yicha ehtiyotkorona bashoratlar bermoqda, 16 tasi esa ularni qayta ko‘rib chiqishni rejalashtirmoqda. Ular orasida Apple, Ford, Porsche va Sony ham bor.
Iqtisodchilarning fikricha, kompaniyalarning yo‘qotishlari ular o‘z hisobotlarida allaqachon oshkor qilgan summalardan bir necha baravar ko‘p bo‘lishi mumkin.
“Kompaniyalarning mutlaq ko‘pchiligi Trampning beqaror savdo siyosati tufayli zararlarni aniq baholash imkonsiz ekanligini ta’kidlamoqda”, deya qo‘shimcha qilgan Reuters.
Xalqaro savdo bo‘yicha AQSH federal sudi 28-may kuni Amerika rahbarining importga bojlar joriy etish to‘g‘risidagi qarorini amalga oshirishni to‘xtatib qo‘ydi va buni uning prezidentlik vakolatlaridan oshib ketishi bilan izohladi. Sud nafaqat Tramp 2-aprelda e’lon qilgan 185 mamlakat va hududdan keltirilgan mahsulotlarga javob bojlarini, balki Kanada, Xitoy va Meksikadan importga nisbatan ilgari kiritilgan tariflarni ham to‘xtatib qo‘ydi.
Izoh (0)