Rossiya Shahed-136 zarba beruvchi dronlari uchun to‘lov sifatida Eron kompaniyasiga umumiy qiymati taxminan 104 million dollar bo‘lgan kamida 1,8 tonna oltin quymalari berdi. Bu haqda tomonlar o‘rtasidagi shartnomaga kirish huquqiga ega bo‘lgan C4ADS tadqiqot guruhiga tayanib “Agentstvo” xabar berdi.
2023-yil 16-mart sanasiga oid qo‘lda to‘ldirilgan formada 1 788 402,2 gramm oltin yetkazib berilgani va uning narxi har gramm uchun 58,32 dollar etib belgilangani aytilgan. Mazkur hujjat Eronning Sahara Thunder korxonasi va Tataristondagi dronlar yig‘iladigan “Alabuga” maxsus iqtisodiy zonasi o‘rtasida imzolangan.
Bundan tashqari, 2023-yil 5-aprel sanasidagi boshqa bir shartnomada yana bir partiya — 2 067 795,9 gramm (ikki tonnadan ortiq) oltin haqida so‘z boradi. Bu ham Eron tomoniga mo‘ljallangan. Biroq yetkazib berish tafsilotlari hozircha noma’lumligicha qolmoqda.
Tahlilchilarga ko‘ra, oltindan foydalanish AQSH sanksiyalari tufayli cheklangan dollar operatsiyalarini chetlab o‘tishga imkon bergan. Qimmatbaho metallar bilan hisob-kitoblar bitim ishtirokchilarining yuqori anonimligini ham ta’minlaydi.
“Alabuga” yetkazib berish haqini faqat oltin bilan to‘lamagan. Hisobotda Rossiya tomoni Birlashgan Arab Amirliklari dirhamidagi mablag‘larni Dubay bankidagi hisob raqamiga o‘tkazgani haqida so‘z boradi. Bu operatsiyalar BAAdagi erkin iqtisodiy zonalar orqali amalga oshirilgan, ular soliq imtiyozlari va kapitalning soddalashtirilgan harakatini ta’minlaydi.
Shuningdek, sanksiyalar ostidagi tuzilmalar, jumladan, Eron tuzilmalari kriptovalyutalarda hisob-kitobni amalga oshirgan bo‘lishi mumkin. Tadqiqotchilar fikricha, bunga AQSH sanksiyalari ostida bo‘lgan yana bir Eron kompaniyasi — SAS xodimlarining sirli yozishmalari ishora qilmoqda. 2023-yil mart oyida Belarus prezidenti Aleksandr Lukashenkoning Tehronga tashrifiga oid xatlardan birida SAS vakillari aeroport xizmatlari uchun Tether kriptovalyutasi bilan to‘lashni taklif qilgan.
Sahara Thunder 2024-yil aprel oyida AQSH sanksiyalari ostida qolgan. Bunga uning Eron Mudofaa vazirligi bilan aloqalari va Rossiyaga dronlar yetkazib berishda ko‘maklashgani sabab bo‘lgan. AQSH kompaniyani Eron harbiy tuzilmalarining niqobi sifatida faoliyat yuritishda hamda Rossiya, Xitoy va Venesuela bilan eksport operatsiyalarida ishtirok etganlikda aybladi.
Eron reyestrlariga ko‘ra, sanksiyalar kiritilgandan so‘ng Sahara Thunder’ni yo‘q qilish jarayoni boshlangan. Biroq The Washington Post ta’kidlaganidek, uning o‘rniga tez orada yangi yuridik tuzilma tashkil etilishi ehtimoli yuqori.
Izoh (0)