Bugun, 9-aprel kuni Xitoy Moliya vazirligi AQSHdan olib kelinadigan barcha tovarlarga 84 foizlik umumiy boj tariflari qo‘llanishini e’lon qildi. Bu Qo‘shma Shtatlardan importga qo‘yilgan 34 foizlik tariflarni yana 50 foizga oshirish orqali shakllangan ko‘rsatkichdir. U 10-apreldan kuchga kiradi.
Pekinning mazkur qarori AQSH prezidenti Donald Tramp tomonidan e’lon qilingan 104 foizlik tariflarga keskin munosabat sifatida baholanmoqda. Tramp bu bojlarni “o‘zaro adolatli javob” deb atagan.
Qo‘shma Shtatlarning tarif siyosatini bosqichma-bosqich kuchaytirishi xatoni xato bilan to‘ldirishdir. Bu Xitoyning qonuniy huquqlari va manfaatlariga jiddiy putur yetkazmoqda, deyiladi Xitoy Moliya vazirligi bayonotida.
Bu holatni “jarohat ustiga tuz sepish” deb atagan Pekin Oq uy ustidan Jahon savdo tashkilotiga (JST) rasmiy murojaat bilan chiqdi. Xitoy hukumatining tashkilotga yuborgan bayonotida “vaziyat xavfli darajada keskinlashgani” va “Qo‘shma Shtatlarning beparvo siyosati global savdoga jiddiy xavf tug‘dirayotgani” ta’kidlangan.
Shu bilan birga Xitoy tashqi savdo balansiga doir fikrlarga ham munosabat bildirdi. Pekin AQSH bilan o‘zaro savdoda shakllangan profitsitni “iqtisodiy muqarrarlik” deb atab, “zarur bo‘lsa, savdo urushini davom ettirishga yetarlicha kuch va iroda topishi”ni bildirdi.
AQSH tariflarni muzokaralar uchun bosim o‘laroq ko‘rmoqda
Donald Tramp ko‘plab yetakchilar tariflar bosimi ostida muzokara o‘tkazishga intilayotganini ta’kidladi. Fox Business’ga bergan intervyusida u tariflarni bir tomondan “doimiy choralar” deb atagan bo‘lsa, ikkinchi tarafdan “muzokaraga undovchi qurol” deb sifatida ko‘rsatdi.
Savdo urushi global moliyaviy bozorlarni larzaga keltirdi. Qo‘shma Shtatlarning S&P 500 indeksi 1950-yillardan buyon eng katta yo‘qotishni qayd etib, o‘zining eng yuqori nuqtasidan 20 foizga pastladi. Iqtisodchilar tilida bu texnik jihatdan “ayiq bozori” deb ataladi.
Biroq Xitoy tomonidan e’lon qilingan qaror hali hammasi degani emas. Yevropa Ittifoqi ham Tramp bojlariga javoban 25 foizli tariflar joriy qilishni ko‘zlamoqda. Reuters’ning yozishicha, u motosikllar, parranda go‘shti, mevalar, yog‘och va kiyim-kechak kabi mahsulotlarga tatbiq etilishi mumkin.
Izoh (0)