Birlashgan Arab Amirliklari fuqarolari uchun ChatGPT Plus’dan foydalanish bepul bo‘ladi. OpenAI va Amirliklar o‘rtasida tegishli kelishuvga erishildi. Bu haqda Khaleej Times xabar berdi.
Maqsad ilg‘or sun’iy intellekt vositalari yordamida insonlar hayotini yanada osonlashtirishdir. Hozirda dunyo bo‘ylab taxminan 20 million odam ChatGPT’ning pullik obunasidan foydalandi va bu oyiga 400 million dollardan ko‘proq daromad keltirmoqda. ChatGPT Plus eng so‘nggi GPT-40 modelidan foydalanish, tezroq javob berish, vaqt va talab yuqori bo‘lgan davrda ustuvor foydalanish afzalliklarini taqdim etadi.
OpenAI ma’lumotlariga ko‘ra, bepul versiya GPT-40 (ba’zi cheklovlar bilan), fayllarni yuklash, ovoz va boshqa vositalarga kirishni ta’minlaydi, Premium obunachilar uzaytirilgan limitlar va kengaytirilgan funksiyalardan foydalanadi.
Hamkorlik doirasida Abu Dabida katta SI ma’lumotlar markazi — Stargate UAE qurilmoqda. Bu yerda dunyodagi eng kuchli kompyuter tizimlaridan biri joylashtiriladi. OpenAI hukumatlar bilan milliy SI strategiyalarini ishlab chiqishda hamkorlik qilishni va AQSH siyosatiga muvofiq harakat qilishni maqsad qilgan.
Loyiha Nvidia, Oracle, Cisco, SoftBank va mahalliy SI kompaniyasi G42 kabi yirik texnologiya kompaniyalari tomonidan qo‘llab-quvvatlanmoqda. Yaratilayotgan vositalar mahalliy tilni qo‘llab-quvvatlaydi, BAA qonunlariga amal qiladi va foydalanuvchilarning ma’lumotlarini himoya qiladi.
Izoh (0)