HAMAS AQSHning G‘azo bo‘yicha o‘t ochishni to‘xtatish va garovdagilarni ozod qilish taklifini rad etdi. Bu haqda guruh vakiliga tayanib BBC xabar berdi.
AQSH 29-may kuni o‘t ochishni to‘xtatish rejasiga Isroil rozilik bildirgani, HAMASdan esa javob kutayotganini ma’lum qilgan edi. Isroil ommaviy axborot vositalariga ko‘ra, yahudiy rasmiylari quyidagicha kelishuv amalga oshishi mumkinligini aytgan: HAMAS ikki bosqichda 10 nafar tirik garovdagilarni va 18 nafar halok bo‘lgan garovdagilarning jasadini topshiradi. Buning evaziga Isroil 60 kunlik o‘t ochishni to‘xtatadi va qamoqdagi falastinlik mahbuslarni ozod qiladi.
HAMAS rasmiysi bu taklif asosiy talablarni, jumladan, urushni tugatish talablarini qondirmasligini va shunga yarasha yo‘l tutishini bildirgan. Isroil hukumati bunga izoh bermagan, biroq bosh vazir Binyamin Netanyaxu 29-may kuni garovga olinganlarning oilalariga Vitkovning rejasini qabul qilganini bildirgan.
Isroil G‘azoga to‘liq blokada qo‘yib, 18-mart kuni AQSH, Qatar va Misr vositachiligida ikki oylik o‘t ochishni to‘xtatish rejimi barbod bo‘lganidan keyin HAMASga qarshi harbiy hujumini qayta boshlagan edi. Mamlakat maqsadi garovda ushlab turilgan 58 kishini ozod qilish uchun HAMASga bosim o‘tkazish ekanini aytmoqda. Garovdagilardan 20 nafari hali ham tirikligi aytilmoqda.
Izoh (0)