AQSHdagi noqonuniy muhojir prezident Donald Trampni o‘ldirish bilan tahdid qildi. U suiqasddan so‘ng o‘zini deportatsiya qilishga va’da berib, xat yubordi. Bu haqda ichki xavfsizlik vaziri Kristi Noemga tayanib CNN xabar berdi.
Ayblanuvchi 54 yoshli Ramon Morales-Reyes bo‘lib, hozirda hibsda saqlanmoqda. U 1998—2005-yillar oralig‘ida AQSHga kamida to‘qqiz marta noqonuniy kirgan. Muhojir prezidentning mitinglaridan birida uning boshiga o‘q uzish bilan tahdid qilgan. Tegishli xatni Immigratsiya va bojxona boshqarmasi hamda boshqa huquq-tartibot idoralariga yuborgan.
Biz bu prezidentning meksikaliklar bilan o‘ynashishidan charchadik — biz bu mamlakat uchun siz oq tanlilardan ko‘ra ko‘proq ish qildik. Siz oilamni deportatsiya qildingiz va Tramp o‘ziga munosibini olishi vaqti keldi, deb o‘ylayman. Men o‘zimni Meksikaga deportatsiya qilaman, lekin buning oldidan 30-6 kalibrli miltig‘imni ishlatib sizning aziz prezidentingizning boshiga o‘q uzaman — uni katta mitinglaridan birida ko‘raman, deb yozgan muhojir o‘z xatida.
Tahdid bo‘yicha tergov davom etmoqda. Tergov davomida aniqlanishicha, bu shaxs AQSHda noqonuniy ravishda yashagan va jinoyat tarixiga ega bo‘lgan. U hozircha hibsda qoladi, deydi Ichli xavfsizlik vazirligi rasmiysi.
Migrantning jinoyat tarixida og‘ir avtohalokatdan so‘ng voqea joyidan qochib ketish, mol-mulkka zarar yetkazish va oilaviy zo‘ravonlik alomatlari bilan tartibsizlik kabi ayblovlar mavjud.
Trampga suiqasd
Donald Tramp saylov kampaniyasi davomida ikkita suiqasdga urinishga duch kelgandi. 13-iyul kuni Pensilvaniyadagi mitingda siyosatchi qulog‘idan yaralangandi, tadbir ishtirokchilaridan biri halok bo‘lgan, yana ikki kishi jarohatlangan. Jinoyatda gumon qilinayotgan 20 yoshli Tomas Metyu Kruksni Maxfiy xizmat yo‘q qilgan.
Respublikachiga ikkinchi marta suiqasd qilish harakati 15-sentyabr kuni Florida shtatidagi golf klubi yaqinida sodir bo‘lgan. Maxfiy xizmat xodimlari butalar orasida yashiringan 58 yoshli Rayan Rautga qarata o‘t ochgan. Voqea joyidan avtomobilda qochib ketmoqchi bo‘lgan erkak ushlangan. Hodisa joyida nishonli AK-47 avtomati, ikkita ryukzak va GoPro kamerasi topilgan. Raut qotillikka tayyorgarlik ko‘rishda ayblangan.
Izoh (0)