AQSH prezidenti Donald Tramp Xitoydan import qilinadigan tovarlarga qo‘yilgan boj stavkasini 145 foizgacha oshirdi. Bu haqda dastlab CNBS xabar qildi.
Oq uyning telekanalga izoh berishicha, Tramp ma’muriyati tomonidan Xitoy mahsulotlariga nisbatan joriy etilgan bojlarning umumiy hajmi 145 foizga yetgan. Mazkur qaror 2-aprel kuni e’lon qilingan “o‘zaro boj siyosati” doirasida amalga oshirildi.
Avvaliga AQSH prezidenti barcha davlatlar uchun 10 foizlik asosiy tariflarni joriy qilgan edi. Ammo bojlar har bir davlatning Qo‘shma Shtatlar bilan savdo balansiga qarab individual hisob-kitob asosida belgilanmoqda. Xitoy bilan savdoda yirik defitsit mavjudligi bois AQSH bu mamlakat uchun tariflarni ancha yuqori darajaga ko‘tarib, 54 foizga yetkazgan edi. Bunga javoban Xitoy Davlat kengashi Amerika mahsulotlariga 34 foizlik qo‘shimcha boj joriy qildi.
Bunga javoban Tramp ma’muriyati bojlarni 104 foizga yetkazdi. Pekin esa 84 foizlik qo‘shimcha tarif bilan javob qaytardi. Bundan norozi bo‘lgan Tramp 24 soat ichida bojlarni avvaliga 125 foiz, keyin esa 145 foizgacha ko‘tarishga qaror qildi.
Xitoy Tashqi ishlar vazirligi rasmiy vakili Lin Tsyan bayonot berib, Pekin bojxona urushidan manfaatdor emasligi, biroq o‘z manfaatlarini himoya qilishdan ham cho‘chimasligini ma’lum qildi.
“Tariflar orqali hech kim g‘olib bo‘lmaydi. Xitoy urush istamaydi, lekin kurashdan ham qo‘rqmaydi”, dedi Lin Tsyan.
Mutaxassislar fikriga ko‘ra, ushbu qadam ikki tomonlama savdo munosabatlarida keskinlikni kuchaytiradi va global iqtisodiyotga salbiy ta’sir ko‘rsatishi mumkin.
Izoh (0)