AQSH federal sudi 28-may kuni prezident Donald Trampning joriy etgan aksariyat bojlarini taqiqlashini ma’lum qildi. Bu haqda CNN xabar berdi.
Sudga ko‘ra, Trampning bunday qaror chiqarishga vakolati yetarli emas. Bu bojlar mahsulot narxlarini ko‘tarib, katta kompaniyalar va oddiy fuqarolar uchun qiyinchilik tug‘dirgan.
Ammo Tramp ma’muriyat bu qaror ustidan 28-may kuni darhol shikoyat qildi. Bu prezident joriy qilgan import bojlari saqlanib qoladimi, yo‘qmi degan savolni keltirib chiqardi.
Manxettendagi AQSH Xalqaro savdo sudi tarkibidagi uch nafar sudyadan iborat hay’at Tramp favqulodda iqtisodiy vakolatlariga tayanib joriy qilgan global boj to‘lovlarini, jumladan 2-aprel kuni e’lon qilgan “Ozodlik kuni” bojlarini to‘xtatgan. Sud, shuningdek, prezidentning yil boshida Xitoy, Meksika va Kanadaga qarshi joriy qilgan bojlarini ham kuchga kiritishini taqiqlagan. Bu bojlar AQSHga fentanil (giyohvand modda) kirib kelishiga qarshi kurashish maqsadida joriy qilingan edi.
Bu qaror asosida Trampning Xitoyga qo‘ygan 30 foiz bojlari, Meksika va Kanadaga qo‘yilgan 25 foiz bojlari, shuningdek, ko‘pchilik tovarlarga qo‘yilgan 10 foiz universal boj to‘xtatiladi. Ammo avtomobil, avtomobil qismi, po‘lat va alyuminiyga qo‘yilgan 25 foiz bojlar saqlab qolinadi.
Ushbu da’vo Liberty Justice Center nomli tashkilot tomonidan kiritilgan bo‘lib, ular va boshqa kichik bizneslar bojlar tufayli zarar ko‘rganini aytgan. Sud barcha sudyalarning roziligi bilan qaror chiqargan.
2-aprelda Tramp o‘z ittifoqchilariga qarshi katta bojlar e’lon qilgan, ammo keyin 90 kunlik muddatga to‘xtatgan edi. Hozirda esa universal 10 foiz bojlar davom etmoqda.
“Saylanmagan sudyalar milliy favqulodda vaziyatni qanday hal qilish kerakligini belgilay olmaydi. Prezident Tramp Amerikani birinchi o‘ringa qo‘yishga va’da bergan va hukumat bu inqirozni hal qilish hamda Amerikaning qudratini tiklash uchun barcha vakolatlaridan foydalanishga sodiq”, dedi Oq uy vakili Kush Desai bayonotida.
Izoh (0)