AQSH prezidenti Donald Tramp Xitoy tovarlariga tariflarni 104 foizdan 125 foizga oshirdi. Bu haqda u Truth Social ijtimoiy tarmog‘idagi sahifasida ma’lum qildi.
Xitoyning jahon bozorlariga hurmatsizlik bilan munosabatda bo‘lishini hisobga olib, men AQSHda Xitoy tovarlariga qo‘yilgan bojlarni 125 foizga oshiraman. Bu qaror darhol kuchga kiradi, deb yozgan Tramp.
U Pekin yaqin kelajakda “Qo‘shma Shtatlar va boshqa mamlakatlarni talon-toroj qilish” davri tugaganini tushunishiga umid bildirgan. AQSH muzokaralar uchun murojaat qilgan 75 mamlakat uchun bojlarni 90 kunga kechiktirmoqda. Bu davrda 10 foizlik stavka qo‘llanadi.
Xitoy fuqarolarini AQSHga bormaslikka chaqirdi
Xitoy hukumati Tramp ma’muriyati tomonidan savdo bojlarining keskin oshirilishiga javobni kengaytirish doirasida Qo‘shma Shtatlarga bormoqchi bo‘lgan o‘z fuqarolarini avval jiddiy “xavfni baholashga” chaqirdi.
Xitoy va AQSH o‘rtasidagi savdo munosabatlarining yomonlashishi va Amerikadagi xavfsizlik muammolari nuqtai nazaridan Madaniyat va turizm vazirligi Xitoy fuqarolariga Qo‘shma Shtatlarga sayohat qilish xavfini sinchkovlik bilan baholashni va ehtiyotkorlik bilan harakat qilishni maslahat beradi, deyiladi vazirlik xabarida.
Tegishli bayonot Tramp tomonidan Xitoy eksportiga kiritilgan yangi 125 foizlik bojlar sababli e’lon qilindi.
AQSH va Xitoyning savdo urushi
AQSH prezidenti Donald Tramp 2-aprel kuni 185 ta mamlakatdan import qilinadigan mahsulotlarga boj joriy etilishini aytdi. Dastlab Xitoydan keltiriladigan mahsulotlar uchun bojlar 34 foiz darajasida belgilangan. Bunga javoban Pekin ham shuncha miqdorda Amerika tovarlariga bojlar solgan.
Shundan so‘ng Tramp agar Pekin javob choralaridan voz kechmasa, bojlarni 50 foizgacha oshirish bilan tahdid qilgan edi. Shu sababli bojlar 104 foizga oshgan. Bunga javoban Xitoy Amerika mahsulotlari uchun bojlarni 84 foizga oshirishini e’lon qildi. Mazkur e’lon ortidan Tramp endilikda Pekin uchun tariflar 125 foizga chiqishini aytdi.
Izoh (0)