Yevropa Ittifoqi 15-apreldan AQSHdan olib kiriladigan ayrim turdagi tovarlarga maxsus yig‘imlar joriy etadi. Qaror AQSH prezidenti Donald Tramp may oyida joriy etgan tariflarga javoban qabul qilinmoqda. Bu haqda Yevrokomissiyaga tayanib, Deutsche Welle xabar berdi.
Yevroittifoqning bojlari dastlab Amerika jinsilari, viski, yeryong‘oq moyi, motosikllar va boshqa tovarlarga nisbatan qo‘llanadi.
Bizning eng muhim hamkorimiz bo‘lgan AQSH bilan hozirgi savdo munosabatlarimiz murakkab ahvolda. Tariflar Yevropa Ittifoqi eksportining katta qismiga ta’sir qiladi. Yevroittifoqning AQSHga eksporti 380 milliard yevroni tashkil etadi. Ya’ni eksportimizning deyarli 70 foizi mavjud tariflar bilan qo‘shib hisoblaganda 20 yoki 25 foiz yoki undan ham yuqori bo‘lgan tariflarga duch kelmoqda... Masalan, yengil avtomobillar uchun bojlar 27,5 foizni tashkil etadi, deydi Savdo va iqtisodiy xavfsizlik masalalari bo‘yicha yevrokomissar Marosh Shefchovich.
U Yevropa Ittifoqi AQSH bilan muzokaralar stoliga u tayyor bo‘lgan zahoti o‘tirishini aytdi, ammo blok “cheksiz kutib o‘tirmaydi”.
Sezilarli natijalarni ko‘rmagunimizcha, biz uch yo‘nalishda ish olib boramiz: qarshi choralar yordamida manfaatlarimizni himoya qilish, yangi bitimlar orqali savdomizni xilma-xil qilish va zararli savdo og‘ishlarining oldini olish, dedi Shefchovich.
Rejalarga ko‘ra, yangi bojlar AQSHdan qishloq xo‘jaligi mahsulotlariga, xususan, parranda go‘shti, mol go‘shti, ba’zi dengiz mahsulotlari, yong‘oqlar, tuxum, sut mahsulotlari, shakar va sabzavotlarga ta’sir qiladi. Bundan tashqari, ro‘yxatga to‘qimachilik kabi ba’zi sanoat mahsulotlari, shuningdek, charm mahsulotlari, maishiy texnika, asboblar, plastmassa va yog‘och kirishi mumkin. Ushbu chora-tadbirlar paketi ishlab chiqish bosqichida.
Yevropa Ittifoqining AQSH import bojlariga qarshi choralarining bir qismi 15-apreldan, qolganlari esa 15-maydan kuchga kiradi. AQSH prezidenti Donald Tramp o‘zi joriy qilgan bojlarga javob choralari ko‘radigan davlatlar yanada kattaroq bojlarga duch kelishini aytgandi.
Trampning savdo siyosati
AQSH prezidenti tomonidan dunyo tovarlariga nisbatan bojlar 2-aprel kuni e’lon qilindi. Unga ko‘ra, O‘zbekiston mahsulotlariga 10 foizlik boj belgilangan, ayrim mamlakatlar uchun esa bu ko‘rsatkich 50 foizga yetgan. Mazkur choralar jahon iqtisodiyotida sekinlashuv xavotirlarini kuchaytirdi.
Investorlar an’anaviy xavfsiz aktivlar, jumladan, oltinga sarmoya kiritishni boshlagan. Natijada 3-aprel kuni tarixda ilk bor oltin narxi bir unsiya uchun 3200 dollardan oshgan. Xitoy javoban AQSH mahsulotlariga 34 foizlik boj joriy etgan.
Tramp 12-martdan boshlab Yevropa Ittifoqidan 28 milliard dollarlik po‘lat va alyuminiy importiga 25 foizlik boj belgilagan edi. Shu kuni Yevropa komissiyasi rahbari Ursula fon der Lyayen ittifoq tomonidan 26 milliard dollarlik “kuchli, ammo mutanosib” qarshi choralarga tayyorlanayotganini e’lon qilgan.
Izoh (0)