Xitoy Amerika tovarlariga bojlarni avval e’lon qilingan 84 foizdan 125 foizgacha oshiradi. Bu haqda mamlakat Moliya vazirligiga tayanib, Reuters xabar berdi.
Qaror 12-apreldan kuchga kiradi. Bunga AQSHning Xitoy mahsulotlariga bojlarni 145 foizga oshirgani sabab bo‘ldi. Xitoy shu munosabat bilan Jahon savdo tashkilotiga shikoyat qildi. Si Szinpin mazkur savdo urushi borasida quyidagicha bayonot berdi:
Boj urushida g‘oliblar bo‘lmaydi, dunyoga qarshi chiqish bu o‘zini yakkalashdir. So‘nggi 70 yilda Xitoy doim o‘z kuchiga, mashaqqatli kurash va mehnatsevarlikka tayangan. Pekin hech qachon birovning iltifotiga suyanmagan va asossiz bosimlardan cho‘chimagan, degan Xitoy raisi.
U AQSH prezidentining bojlariga qarshi kurashish uchun Yevropa Ittifoqini Xitoy bilan sa’y-harakatlarni birlashtirishga chaqirdi.
Avvaliga AQSH prezidenti Donald Tramp barcha davlatlar uchun 10 foizlik asosiy tariflarni joriy qilgandi. Ammo bojlar har bir davlatning savdo balansiga qarab o‘zgargan. Xitoy bilan savdoda yirik defitsit mavjudligi bois AQSH bu mamlakat uchun tariflarni ancha yuqori darajaga ko‘tarib, 34 foizga yetkazgan.
Unga javoban Pekin ham shuncha miqdorda Amerika tovarlariga bojlar solgan. Shundan so‘ng Tramp agar Pekin javob choralaridan voz kechmasa, bojlarni 50 foizgacha oshirish bilan tahdid qilgan. Shu sababli bojlar 104 foizga oshgan.
Bunga javoban Xitoy Amerika mahsulotlari uchun bojlarni 84 foizga oshirishini e’lon qildi. Mazkur e’lon ortidan Tramp Pekin uchun tariflar 125 foizga chiqishini aytdi, keyinchalik buni 145 foizga oshirdi.
Xitoy AQSHni “o‘zaro bojlar”ni bekor qilishga va o‘zining noto‘g‘ri amaliyotini tuzatishga chaqirmoqda. Pekin javob bojlarini oshirish haqidagi bayonoti fonida dollar Shveysariya frankiga nisbatan so‘nggi 10 yildagi eng past darajaga tushdi.
AQSH bojlari tufayli jahon savdosi 3-7 foizga, jahon yalpi ichki mahsuloti esa 0,7 foizga qisqarishi mumkin. Rivojlanayotgan mamlakatlar eng ko‘p zarar ko‘rishi kutilmoqda.
Izoh (0)