Rossiya Ukrainadagi urushda qo‘llab-quvvatlagani uchun Shimoliy Koreyaga kompensatsiya sifatida kamida bitta “Pansir” havo hujumidan mudofaa tizimini topshirgan. Bu haqda 11 ta davlat tomonidan tuzilgan Xalqaro sanksiyalar monitoringi guruhi hisobotida ma’lum qilindi.
Guruh razvedka ma’lumotlaridan foydalangan, hisobot asosan Rossiyaning Shimoliy Koreya bilan hamkorligiga bag‘ishlangan. Unga ko‘ra, samolyot, vertolyot, qanotli raketa va dronlarni yo‘q qilishga mo‘ljallangan “Pansir” tizimi Shimoliy Koreya havo mudofaa tizimini kuchaytiradi. KXDRdagi mavjud tizimlar samarasiz va eskirgani aytilmoqda.
Shimoliy Koreyaning yangi “Chxyo Xyon” esminetsidagi qurollar Rossiyaning “Pansir” majmuasiga o‘xshash ekani ta’kidlangan. Rossiya KXDRga zamonaviy radioelektron kurash vositalari, signalni buzuvchi texnikalar bergani, shuningdek, ballistik dasturni rivojlantirishga ko‘maklashayotgani aytilmoqda. Xususan, Moskva raketa sinovlari natijalari bo‘yicha fikr-mulohazalarni Pxenyanga taqdim etmoqda. Bu esa nishonga muvaffaqiyatli olish imkonini beradi.
Bu Rossiya BMT Xavfsizlik kengashining doimiy a’zosi sifatida ovoz bergan Pxenyanga nisbatan BMT Xavfsizlik kengashi rezolyutsiyalarining buzilishidir, deyiladi xabarda.
AQSH Kongressi tahliliy xizmatiga ko‘ra, Rossiyaning texnik yordami KXDRning yadroviy salohiyatini ham sezilarli darajada oshirgan. Pxenyan 90 tagacha yadroviy kallak ishlab chiqarish uchun yetarli material to‘plagani aytilmoqda. Ulardan 50 ga yaqini allaqachon yig‘ilgan bo‘lishi mumkin.
Tahlilchilar fikricha, Rossiyaning yordami Shimoliy Koreyaning urushda ko‘rsatgan yordami bilan bog‘liq. Kursk viloyatidagi hujumini qaytarishda 14 ming nafar shimoliy koreyalik ishtirok etgani prognoz qilingan. KXDR o‘q-dorilar yetkazib bergani ham ma’lum qilingan.
2023-yil sentyabr oyidan beri Shimoliy Koreya Rossiyaga 20 mingdan ortiq harbiy yuk konteynerlarini yetkazib bergan. Ular 9 millionga yaqin artilleriya o‘q-dorilari, 100 dan ortiq ballistik raketalar va 200 dan ortiq og‘ir artilleriyani o‘z ichiga olgan. Bu ta’minot uchta brigadani to‘liq jihozlash uchun yetarli. Janubiy Koreyaning KIDA tahlil markazi hisob-kitoblariga ko‘ra, Shimoliy Koreya 20 milliard dollardan ko‘proq daromad olgan.
Izoh (0)