Isroil hukumati AQSH prezidentining maxsus vakili Stiv Uitkoffning asirlarni ozod qilish va o‘t ochishni to‘xtatish bo‘yicha yangi rejasini qabul qildi. Bu haqda Isroil bosh vaziri Binyamin Netanyaxu ma’lum qildi.
“Bugun kechqurun taqdim etilgan Uitkoffning so‘nggi rejasini qabul qilishga rozimiz. HAMAS hozircha javob bermadi”, dedi Netanyaxu asirlarning oilalari bilan uchrashuvda.
The Times of Israel nashrining xabar berishicha, AQSHning Isroil va Falastin HAMAS harakati o‘rtasidagi G‘azo sektoridagi vaziyatni hal qilish bo‘yicha yangi rejasi G‘azodagi 10 nafar asirni ozod qilishni, shuningdek, 60 kunlik o‘t ochishni to‘xtatish evaziga 18 nafar asirning jasadlarini vataniga qaytarishni nazarda tutadi.
Bundan tashqari, reja BMT tomonidan anklav aholisiga gumanitar yordam yetkazib berishni tiklashni ko‘zda tutadi. Ma’lumotlarga ko‘ra, hujjatda Isroilning “urushni tugatish” va’dalari yo‘q.
HAMAS harakatining telegram kanalida ma’lum qilinishicha, harakat G‘azo sektoridagi asirlar masalasini hal etish va yarashish bo‘yicha AQSH maxsus vakili Stiv Uitkoff taqdim etgan yangi takliflarni o‘rganmoqda.
“HAMAS rahbariyati Uitkoffdan yangi takliflar oldi va ularni G‘azo aholisining manfaatlariga mos kelishi hamda doimiy o‘t ochishni to‘xtatishga olib kelishi nuqtai nazaridan sinchiklab o‘rganmoqda”, deyiladi xabarda.
26 may kuni Reuters agentligi HAMAS Amerika tomoni taklif qilgan yarashuvga rozi bo‘lgani haqida xabar bergan edi, biroq tez orada Uitkoff bu ma’lumotni inkor etdi. Uning aytishicha, HAMASning haqiqiy pozitsiyasi “hafsalani pir qiladigan va mutlaqo qabul qilib bo‘lmaydigan”.
Izoh (0)