AQSH Kongressi Vakillar palatasi a’zosi Jeymi Raskin (Merilend shtatidan demokrat) prezident Donald Trampdan u uyushtirgan investorlar uchun kechki ovqat ishtirokchilarining ismlarini oshkor qilishni va mehmonlarning uning “memkoin” kriptovalyutasini sotib olish uchun sarflagan mablag‘lari manbalari haqida hisobot berishni talab qildi. Bu haqda kongressmenning maktubi bilan tanishgan The Washington Post (WP) gazetasi xabar bermoqda.
“Ushbu ro‘yxatning e’lon qilinishi Amerika xalqiga prezidentning cho‘ntagiga yuzlab million dollarni kim solayotganini bilish imkonini beradi. Shundan so‘ng biz amalda foydasiz bo‘lgan memkoinlardan tashqari, ular buning evaziga yana nimalar olayotganini aniqlashga kirishishimiz mumkin”, deyiladi maktubda.
Shuningdek, kongressmen memkoinlarni sotishdan olingan mablag‘lar terrorchilik tashkilotlari, narkokartellari va boshqa jinoiy faoliyat bilan bog‘liq emasligini tekshirishga chaqirgan. Raskinning fikricha, bu kechki ovqat Tramp va uning oilasi hokimiyatga qaytganidan keyin boyishiga imkon bergan yana bir firibgarlik bo‘lgan.
Nashr ma’lumotlariga ko‘ra, Raskin shu tariqa Amerika prezidentiga nisbatan parlament tekshiruvini boshlagan.
Avvalroq Oq uy matbuot kotibi Kerolin Livitt 22-mayda bo‘lib o‘tgan investorlar bilan kechki ovqat rasmiy tadbir bo‘lmaganini va Tramp unda xususiy shaxs sifatida ishtirok etganini ma’lum qilgan edi. Uning ta’kidlashicha, davlat rahbari prezidentlik davrida manfaatlar to‘qnashuviga yo‘l qo‘ymaslik uchun barcha aktivlarini o‘z farzandlariga ishonchli boshqaruvga topshirgan.
Tramp o‘z kriptovalyutasini ishga tushirishini yanvar oyida Truth Social ijtimoiy tarmog‘ida, inauguratsiya arafasida e’lon qilgan edi. CoinMarketCap platformasi ma’lumotlariga ko‘ra, uning kunlik savdolari hajmi 11 milliard dollardan oshgan, bu esa mutaxassislarning fikricha, g‘oyat yuqori daromadlilik darajasini ko‘rsatgan.
Izoh (0)