Butun dunyo bo‘ylab ukrainalik 7 million qochqin qayd etilgan. Ularning aksariyati 2022-yilda urush boshlanganidan so‘ng Ukrainani tark etgan. Biroq bu jarayon hozir ham davom etmoqda. Bu haqda “RBK-Ukraina” Iqtisodiyot vazirligining “Ukraina iqtisodiyotidagi asosiy voqealar monitoringi — 2025-yil mart” hisobotiga asoslanib ma’lum qilmoqda.
Hisobotda ta’kidlanishicha, BMTning Qochoqlar ishlari bo‘yicha agentligi ma’lumotlariga ko‘ra, 2025-yil 17-aprel holatiga ko‘ra, butun dunyo bo‘ylab Ukrainadan 6,918 million qochqin (Yevropada 6,358 million va undan tashqarida 0,56 million) qayd etilgan.
2024-yil 16-dekabr holatiga nisbatan Yevropadagi qochqinlar soni 104 ming kishiga ko‘paygan.
BMT ma’lumotlariga ko‘ra, eng ko‘p ukrainaliklar Germaniyada — 1,443 mln, Polshada — 999,7 ming, Chexiyada — 401,4 ming, Buyuk Britaniyada — 254 ming, Ispaniyada — 235,7 ming, Italiyada — 171 ming, Fransiyada — 70,1 ming kishini tashkil etadi.
Bundan tashqari, 2022-yil 30-iyun holatiga ko‘ra Rossiyada 1,2 million, Belarusda esa 2025-yil 31-mart holatiga ko‘ra 44 ming qochqin qayd etilgan.
O‘tgan yil davomida Ukrainadan muhojirlarning chiqib ketishi davom etib, yil davomida jami, taxminan, 500 ming kishini tashkil etgan.
Ukraina Markaziy bankining bashoratiga ko‘ra, joriy yilda yana 200 ming kishi mamlakatni tark etadi.
Markaziy bank ularning qaytishi 2026-yildan boshlanishini (taxminan 0,2 million kishi) va 2027-yilda tezlashishini (taxminan, 0,5 million kishi) kutmoqda.
Yevrokomissiya ma’lumotlariga ko‘ra, joriy yilning yanvar oyida Yevropa Ittifoqida vaqtinchalik himoya oluvchilar soni taxminan 4,3 million kishini tashkil etgan. Ularning soni yil davomida barqaror qolishi, so‘ngra yil oxiriga kelib 4,1 milliongacha, 2026-yil oxiriga kelib esa 3,8 milliongacha kamayishi taxmin qilinmoqda.
Izoh (0)