G‘arb davlatlari Kiyevga o‘z hududida harbiy xizmatga majbur bo‘lgan ukrainaliklarni topish va ularni Ukrainaga yuborishda yordam berishdan bosh tortdi, deb xabar berdi Bloomberg.
![](/static/2024/08/21/photo_2024-08-21_17-08-53-JPijzpx_.jpg)
Xabarga ko‘ra, Ukraina prezidenti Vladimir Zelenskiy ikki tomonlama uchrashuvlar doirasida ittifoqchilardan bu haqda so‘ragan. Biroq, nashrning ta’kidlashicha, G‘arb davlatlarining siyosatchilari urush davom etar ekan, ukrainalik qochqinlarni o‘z vatanlariga jo‘natmasliklarini aytishgan.
Ukraina rasmiylariga ko‘ra, 2022-yil 24-fevraldan buyon safarbarlik yoshidagi 650 ming nafarga yaqin erkak xorijga ketgan. Harbiy kadrlar tanqisligini hisobga olib, Kiyev ularni qaytarishga harakat qilmoqda. 2024-yil 23-apreldan Ukrainaning xorijdagi diplomatik vakolatxonalari 18 yoshdan 60 yoshgacha bo‘lgan erkaklarga konsullik xizmatlarini ko‘rsatishni to‘xtatgan edi.
Ukraina TIV rahbari Dmitriy Kuleba mazkur qarorni mamlakatda urush ketayotgani va xorijda qolish safarbarlikka tortiluvchi fuqarolarni vatan oldidagi mas’uliyatdan ozod qilmasligi bilan izohlagan.
BMTning Qochqinlar bo‘yicha oliy komissarligi boshqarmasi maʼlumotlariga ko‘ra, hozirda 2022-yil fevralida Rossiya-Ukraina urushi boshlanganidan so‘ng mamlakatni tark etgan 6 millionga yaqin ukrainalik xorijda qochqin bo‘lib qolmoqda. Ukraina markaziy bankining prognozlariga ko‘ra, 2024-yilda yana 400 ming kishi mamlakatni tark etadi.
Izoh (0)