Ukrainalik qochqinlarning uylariga qaytishiga yordam bergan rossiyalik faol Rossiya janubi-g‘arbidagi Belgorod shahrida politsiya hibsxonasida vafot etdi. Bu haqda The Moscow Times nashri xabar berdi.
Xabarda aytilishicha, 61 yoshli Aleksandr Demidenko 2023-yilning oktyabr oyida o‘g‘irlab ketilgan va qiynoqqa solingan. Demidenkoga dastlab jamoat joyida spirtli ichimlik isteʼmol qilganlik ayblovi qo‘yilib, 10 kunlik qamoq jazosi tayinlangan. Qamoqdan chiqqanidan ko‘p o‘tmay esa noqonuniy qurol saqlaganlikda ayblanib, tergov hibsxonasiga joylashtirilgan.
Rossiyaning “Vot Tak” mahalliy nashri maʼlumotlariga ko‘ra, Demidenko 5-aprel kuni Belgoroddagi tergov izolyatorida vafot etgan. Uning vafot etgani haqida esa 8-aprel kuni xabar qilingan.
Rossiyalik faolning xotini va o‘g‘liga dastlab xabar berilgan. Belgoroddagi bir qancha mahalliy nashrlar ham uning vafotini 8-aprel kuni tasdiqlagan.
Rossiya tomonidan egallangan Ukraina sharqiy viloyatlarida 2022-yilning fevralidan beri ukrainlarning ko‘chishi davom etmoqda. Ular Rossiya hukumatiga bo‘ysunishdan bosh tortib, “Kolotilovka” chegara punkti orqali Kiyev nazoratidagi hududlarga o‘tishmoqda. Hozirgi xabarlarga ko‘ra, ushbu chegara postini kuniga kamida 100 nafar etnik ukrain kesib o‘tmoqda.
Aleksandr Demidenko qochqin ukrainlarga boshpana bergani xabar qilingan. Bu esa unga ayblov eʼlon qilinishi uchun bahona bo‘lgani xabar qilingan. Boshqa xabarga ko‘ra, marhum faol “Kolotilovka” chegara punktidagi rus askarlari qochqin ukrainlarni o‘tkazib yuborish evaziga pora talab qilgani haqida maʼlum qilgan.
Izoh (0)