AQSH sobiq prezidenti Jo Baydenga prostata saratonining agressiv shakli tashxisi qo‘yilgan bo‘lib, uning 12 oydan 18 oygacha umri qolgan bo‘lishi mumkin. Bu haqda Oq uyning sobiq shifokori, respublikachi kongressmen Ronni Jekson ma’lum qildi, deya xabar bermoqda Washington Free Beacon.
Baydenning matbuot kotibi 18-may kuni tashxisni tasdiqladi va kasallikni davolash mumkinligini ta’kidladi. Biroq Jeksonning so‘zlariga ko‘ra, muvaffaqiyatli davolanishga umid qilinsa-da, prognozlar tashvishli bo‘lib qolmoqda.
“Bu mening mutaxassisligim emas, lekin bu ma’lum bo‘lganidan beri ko‘plab urologlar bilan suhbatlashdim va ularning barchasi uning 12 oydan 18 oygacha umri qolishi mumkinligi haqida bir fikrga kelishdi. Umid qilamanki, vaqt ko‘proq bo‘ladi va ishonamanki, ular bu kasallikni samarali davolay oladi. U hali ko‘p yillar yashaydi. Lekin bu juda ilgarilab ketgan kasallik”, deydi Ronni Jekson.
Avvalroq onkolog Ezekiel Emanuel kasallikning rivojlanishi Baydenning 2021-yildagi prezidentlik muddati boshidayoq boshlangan bo‘lishi mumkinligini taxmin qilgandi. Ushbu bayonotlar siyosatchining haqiqiy sog‘lig‘i yashirilgan bo‘lishi mumkinligi haqidagi jamoatchilik shubhalarini kuchaytirdi. Ayniqsa, Oq uyning 2024-yil fevral oyidagi tibbiy hisobotida prostata bezida hech qanday muammo yo‘qligi, aksincha, Baydenning sog‘lig‘i “yaxshi” ekani ta’kidlangani e’tiborga molik.
Oq uyning sobiq rahbari hozir 82 yoshda. 2024-yilda u tez-tez adashib gapirishi, unutuvchanligi va omma oldida yiqilishlari tufayli jismoniy va aqliy holatiga shubhalar ortib borayotgan bir paytda prezidentlik poygasidan chiqishga majbur bo‘ldi.
Fuqarolik huquqlari bo‘yicha advokat va AQSH Adliya vazirligi xodimi Leo Terrell mamlakatning sobiq prezidenti Jo Baydenning rafiqasi Jill Bayden keksa odamga e’tiborsizlik bilan munosabatda bo‘lgani uchun jinoiy javobgarlikka tortilishi mumkinligi haqida fikr bildirgan edi.
Donald Tramp AQSHning sobiq prezidenti Jo Bayden hokimiyatda bo‘lgan davrida hech qanday hujjatni shaxsan imzolamaganini ma’lum qilgandi.
Aprel oyida Donald Tramp Rossiya va Ukraina o‘rtasidagi mojaroda AQSHning sobiq rahbari Jo Baydenni aybdor deb atagandi. Bundan oldin esa Tramp Bayden ma’muriyatini AQSH va Rossiya munosabatlarini yomonlashtirishda ayblagandi.
Izoh (0)