Ukrainaga qarshi urushda Rossiya fuqaroligini olgan 20 ming nafar Markaziy Osiyo fuqarosi ishtirok etmoqda. Bu haqda Rossiya Tergov qo‘mitasi raisi Aleksandr Bastrikin ma‘lum qildi.
Uning so‘zlariga ko‘ra, bu reydlarda qo‘lga olingan fuqarolikka qabul qilingan rossiyaliklarning umumiy sonining chorak qismidir.
Harbiy tergov boshqarmamiz reydlar o‘tkazmoqda. Biz allaqachon 80 ming nafar shunday Rossiya fuqarosini qo‘lga oldikki, ular frontga borish u yoqda tursin, harbiy komissariatga (“voyenkomat”) borishni ham istamaydi. Biz 80 ming kishini ushladik, harbiy ro‘yxatga oldik va allaqachon O‘zbekiston, Tojikiston, Qirg‘izistonda yashashni yoqtirmaydigan 20 ming “yosh” Rossiya fuqarolari (urushda) oldingi safda, dedi Bastrikin.
Rossiya fuqaroligini olgan muhojirlar orasida reydlar
Ukrainada urush boshlanganidan keyin Rossiyada muntazam ravishda fuqarolik olgan erkaklarni qidirish bo‘yicha reydlar o'tkazilmoqda.
Ularga chaqiruv qog‘ozlari topshirilib, harbiy komissariatlarga majburan olib ketiladi. Ba’zida erkaklarni Rossiya fuqaroligidan mahrum qilish va o‘z mamlakatiga chiqarib yuborish bilan tahdid qilib, Mudofaa vazirligi bilan shartnoma imzolashga majbur qilishadi.
2024-yil Bastrikin xavfsizlik kuchlari Rossiya fuqaroligini olgan, ammo harbiy ro‘yxatga olinmagan 30 mingdan ortiq muhojirni “tutib olganini” aytgan edi. Ularning 10 mingga yaqini front orti bo‘linmalariga — “okoplar qazish va istehkomlar qurish” — uchun yuborilgan.
Ukraina armiyasiga qarshi urishayotgan o‘zbekistonliklar soni 1000 dan oshdi
Kamida 1110 nafar O‘zbekiston fuqarosi Rossiya Qurolli Kuchlari bilan shartnoma tuzgan. Bu ro‘yxat to‘liq emas. Sababi etnik o‘zbeklarni hisobga olsa, ularning umumiy soni bir necha mingga yetishi mumkin.
Rossiya armiyasi bilan shartnoma tuzganlar orasida kamida 109 kishi halok bo‘lgan. Ularning orasida eng yoshi 21 yoshga to‘lmagan, eng kattasi esa 62 yoshda. Halok bo‘lganlardan biri shartnoma imzolaganidan keyin 8 kun ham yashamagan.
Rossiya armiyasiga o‘zbeklarni yollash tarixi tojiklar bilan juda o‘xshash: O‘zbekistondan kelayotgan muhojirlar oqimi kamayishi haqida gap ham bo‘lishi mumkin emas, Rossiya davlati esa ulardan “to‘p go‘shti” sifatida foydalanishdan mamnun. Markaziy Osiyodan kelganlar qamoq va deportatsiya tahdidlari bilan urushga yollanmoqda, deydi Ukrainaning “Yashashni istayman” loyihasi.
Rossiya armiyasiga qo‘shilish evaziga taklif etilayotgan pul va harbiy targ‘ibot askar yollash sur’atini oyiga 30-40 ming kishiga oshirdi.
Izoh (0)