Qozog‘istonning muxolifatchi jurnalisti Aydos Sodiqov Kiyevda 18-iyun kuni suiqasdga uchrashi ortidan shifoxonada vafot etdi. Bu haqda marhumning rafiqasi Natalya Sodiqova xabar berdi.
“O‘n uch kun davomida Aydos reanimatsiyada hayot uchun kurashdi, ammo hech qanday mo‘jiza sodir bo‘lmadi”, — deb yozadi jurnalistning rafiqasi Facebook’dagi sahifasida.
Aydos Sodiqovga qarshi suiqasd 18-iyun kuni bo‘lib o‘tgan. “Baza” YouTube kanali muallifi Aydos rafiqasi bilan mashinada bo‘lganida boshiga o‘q uzilgan. Shu kuni jurnalist og‘ir ahvolda kasalxonaga yotqizilgan. Hodisa oqibatida jurnalistning rafiqasi jabrlanmagan.
21-iyun kuni Ukraina Bosh prokuraturasi Qozog‘iston fuqarolari Altay Jakanboyev va Meyram Karatayev suiqasd uyushtirishda gumon qilinayotgani haqida xabar bergan. Tergov maʼlumotlariga ko‘ra, ular Kiyevga Polshadan kelgan. 22-iyun kuni Altoy Jakanboyev Ukraina politsiyasiga taslim bo‘lgan.
Qozog‘iston Bosh prokuraturasi ikkinchi gumonlanuvchining qayerdaligini aniqlash bo‘yicha tergov-tezkor tadbirlari o‘tkazilayotganini bildirdi. Tegishli ko‘rsatmani Qozog‘iston prezidenti Qosim-Jo‘mart To‘qayev bergan. Natalya Sodiqova gumonlanuvchilardan biri politsiyachi ekanini yozmoqda. Qozog‘iston Ichki ishlar vazirligi Meyram Karatayev 2019-yilning yanvarida ichki ishlar organlaridan bo‘shatilganini ma’lum qilgan.
Sodiqov rafiqasi Natalya bilan 2014-yildan beri qochqin maqomiga ega bo‘lib, Ukrainada istiqomat qiladi. Qozog‘istonda ular 2023-yildan buyon ijtimoiy, milliy yoki diniy adovat qo‘zg‘atishda ayblanib, qidiruvga berilgan.
Izoh (0)