Rim papasi Lev XIV Vatikanda Rossiya va Ukraina muzokaralarini o‘tkazishga rozilik bildirdi. Bu haqda Italiya hukumati xabar bermoqda.
Ma’lum qilinishicha, Italiya bosh vaziri Jorja Meloni pontifik bilan telefon orqali suhbatlashib, “Ukrainada adolatli va barqaror tinchlik o‘rnatish” uchun zarur bo‘lgan qadamlarni muhokama qilgan. U Lev XIV ning “ochiqko‘ngilliligi va tinchlikka bo‘lgan qat’iy sadoqati” uchun minnatdorlik bildirgan.
Ilgari ham Rim papasi Vatikanni Rossiya va Ukraina o‘rtasidagi muzokaralar uchun joy sifatida taklif etgan edi. Shu bilan birga, u muzokaralarda vositachi bo‘lishga tayyor emasligini ta’kidlagan.
19-may kuni AQSH prezidenti Donald Tramp Vladimir Putin bilan telefon orqali suhbatlashgandan so‘ng, pontifik muzokaralar o‘tkazishdan manfaatdor ekanini alohida ta’kidladi.
Konklav 8-may kuni Lev XIV ni Rimning yangi papasi etib sayladi. Yakshanbadagi ilk murojaatida u Ukrainada tinchlik o‘rnatishga chaqirdi:
“Men qalbimda aziz ukrain xalqining azob-uqubatlarini his qilaman. Iloji boricha tezroq haqiqiy, adolatli va barqaror tinchlikka erishish uchun barcha imkoniyatlar ishga solinsin” dedi u.
Istanbul muzokaralari
10-may kuni Ukraina prezidenti Vladimir Zelenskiy Kiyevda Yevropaning to‘rt davlati rahbarlarini qabul qildi. Sammit yakunida ular qo‘shma bayonot qabul qilib, unda Rossiyadan kamida 30 kun davomida so‘zsiz o‘t ochishni to‘xtatishni talab qildi va yangi sanksiyalar bilan tahdid soldi.
Oradan bir necha soat o‘tib, 11-mayga o‘tar kechasi Rossiya prezidenti Vladimir Putin Kremlda jurnalistlarni to‘plab, Istanbulda 2022-yil bahorida to‘xtab qolgan muzokaralar 15-maydan bir tomonlama tartibda qayta tiklanishini e’lon qildi.
Shundan so‘ng Zelenskiy Turkiyaga kelishini, lekin faqat Putin bilan muzokara olib borishini aytdi. Kreml 14-mayga o‘tar kechasi Rossiya delegatsiyasi tarkibini e’lon qildi. Unga Medinskiy boshchilik qildi.
Rossiya delegatsiyasi 15-may kuni ertalab Istanbulga uchib keldi. Shu kuni tushdan keyin Vladimir Zelenskiy Ukraina rasmiylari bilan birga Turkiya rahbari Rajab Toyyib Erdo‘g‘on bilan muzokaralar o‘tkazish uchun Anqaraga uchib keldi. Uch soatga yaqin davom etgan uchrashuvdan so‘ng Zelenskiy Umerov boshchiligidagi Ukraina delegatsiyasini muzokaralarda ishtirok etish uchun Istanbulga yuborishga roziligini bildirdi.
Istanbulda 16-may kuni Rossiya va Ukraina delegatsiyalari o‘rtasida 2022-yil bahoridan beri birinchi muzokaralar o‘tkazildi. Tomonlar o‘t ochishni to‘xtatish bo‘yicha kelishuvga erisha olmadi, ammo eng yirik asirlar almashinuvini amalga oshirishga kelishib oldi.
Izoh (0)