Rossiya prezidenti maslahatchisi Anton Kobyakov Sovet Ittifoqi “yuridik jihatdan hali ham mavjud” ekanini ma’lum qildi. U Peterburg xalqaro yuridik forumida shunday bayonot berdi.
Kobyakovga ko‘ra, bunday fikrni “konstitutsiyaviy huquq bo‘yicha mutaxassislar”, jumladan, xorijiy ekspertlar ham anchadan beri bildirmoqda.
Ular nega bunday deyishmoqda? Ular SSSRni tarqatib yuborish tartibi buzilgani sababli shunday gapirmoqda. Agar 1922-yilda Xalq deputatlari syezdi, ya’ni Sovetlar syezdi SSSRni tashkil etgan bo‘lsa, uni tarqatish ham o‘sha deputatlar syezdining qarori bilan amalga oshirilishi kerak edi, dedi Putin maslahatchisi.
Shuningdek, u 1991-yil 8-dekabrda imzolangan Belovej bitimlarining huquqiy asoslanganini shubha ostiga oldi.
Keyinchalik bu hujjatlarni RSFSR, Ukraina SSR va BSSR Oliy Sovetlari ratifikatsiya qilgan, lekin bu ularning vakolatiga kirmaydi, deya ta’kidladi u.
Kobyakov o‘zining huquqiy mantig‘iga asoslanib, Rossiyaning Ukrainaga harbiy bosqinini “ichki jarayon” deb atadi. U “zamonaviy voqealarni tushunish uchun SSSRning parchalanishiga tegishli huquqiy baho berish kerakligini” bildirdi.
SSSR go‘yoki mavjudligini davom ettirayotgani haqidagi g‘oya konspirologik doiralarda uzoq vaqtdan beri aylanib kelmoqda. 2000-yillarning boshida ushbu g‘oya atrofida bir nechta harakatlar shakllandi, ularning a’zolari o‘zlarini “SSSR fuqarolari” deb atadi.
Ular, jumladan, Rossiya hujjatlarini tan olishdan, harbiy xizmatni o‘tashdan va kommunal xizmatlar uchun to‘lovlarni amalga oshirishdan bosh tortdi. 2022-yilda Rossiya Adliya vazirligi “SSSR fuqarolari” harakatini ekstremistik deb e’lon qildi va uni tegishli ro‘yxatga kiritdi. Shu yili harakat rahbari Sergey Taraskin ekstremistik tashkilot tuzgani uchun 8 yil ozodlikdan mahrum etilishga hukm qilindi.
Vladimir Putin ilgari ham bir necha bor Sovet Ittifoqining parchalanishidan afsuslanganini bildirgan edi. Xususan, u bu voqeani “XX asrning eng katta geosiyosiy halokati” deb ta’riflagan.
Izoh (0)