Бутун дунё бўйлаб украиналик 7 миллион қочқин қайд этилган. Уларнинг аксарияти 2022 йилда уруш бошланганидан сўнг Украинани тарк этган. Бироқ бу жараён ҳозир ҳам давом этмоқда. Бу ҳақда “РБК-Украина” Иқтисодиёт вазирлигининг “Украина иқтисодиётидаги асосий воқеалар мониторинги — 2025 йил март” ҳисоботига асосланиб маълум қилмоқда.
Ҳисоботда таъкидланишича, БМТнинг Қочоқлар ишлари бўйича агентлиги маълумотларига кўра, 2025 йил 17 апрель ҳолатига кўра, бутун дунё бўйлаб Украинадан 6,918 миллион қочқин (Европада 6,358 миллион ва ундан ташқарида 0,56 миллион) қайд этилган.
2024 йил 16 декабрь ҳолатига нисбатан Европадаги қочқинлар сони 104 минг кишига кўпайган.
БМТ маълумотларига кўра, энг кўп украиналиклар Германияда — 1,443 млн, Польшада — 999,7 минг, Чехияда — 401,4 минг, Буюк Британияда — 254 минг, Испанияда — 235,7 минг, Италияда — 171 минг, Францияда — 70,1 минг кишини ташкил этади.
Бундан ташқари, 2022 йил 30 июнь ҳолатига кўра Россияда 1,2 миллион, Беларусда эса 2025 йил 31 март ҳолатига кўра 44 минг қочқин қайд этилган.
Ўтган йил давомида Украинадан муҳожирларнинг чиқиб кетиши давом этиб, йил давомида жами, тахминан, 500 минг кишини ташкил этган.
Украина Марказий банкининг башоратига кўра, жорий йилда яна 200 минг киши мамлакатни тарк этади.
Марказий банк уларнинг қайтиши 2026 йилдан бошланишини (тахминан 0,2 миллион киши) ва 2027 йилда тезлашишини (тахминан, 0,5 миллион киши) кутмоқда.
Еврокомиссия маълумотларига кўра, жорий йилнинг январь ойида Европа Иттифоқида вақтинчалик ҳимоя олувчилар сони тахминан 4,3 миллион кишини ташкил этган. Уларнинг сони йил давомида барқарор қолиши, сўнгра йил охирига келиб 4,1 миллионгача, 2026 йил охирига келиб эса 3,8 миллионгача камайиши тахмин қилинмоқда.
Изоҳ (0)