Estoniya sobiq prezidenti rossiyaliklarning Yevropaga kirishini taqiqlashni taklif qildi

Estoniyaning sobiq prezidenti Toomas Xendrik Ilves Rossiya fuqarolarining Yevropa Ittifoq davlatlariga kirishini vaqtincha taqiqlash taklifini berdi, deb yozmoqda Meduza.

“Ehtimol, Rossiyadan har qanday, ta’kidlab aytaman, har qanday kirishlar uchun tanaffus kerak. Qrim egallanguniga qadar, ular mag‘rurlik bilan Yevropa Ittifoqida vizasiz rejimni talab qildi. Oilaviy favqulodda holatlardan tashqari, barcha vizalarni muzlatib qo‘ying. Yevropa daxlsizligi xavf ostida”, — deb yozgan Ilves o‘zining Twitter sahifasida.

“Fuqarolik samolyotlarini urib tushirish, Yevropada odamlarni zaharlash va o‘ldirish, davlatlarga bostirib kirish va egallab olish. Bu menga qochqin davlatni eslatyapti”, — deb qo‘shimcha qildi u.

https://twitter.com/IlvesToomas/status/1383524714354593797

Rossiya elchixonasining Razvedka bosh boshqarmasiga (GRU) ishlashda gumon qilingan 18 nafar xodimi Chexiyadan chiqarib yuborilgach, Estoniyani 2006-yildan 2016-yilgacha boshqargan Ilves ushbu murojaat bilan chiqdi.

Shuningdek, Praga rasmiylarining ta’kidlashicha, Rossiyaning maxsus xizmatlari 2014-yil Vrbetitse qishlog‘idagi qurol-yarog‘ omborida bo‘lib o‘tgan portlashlarga ham aloqador. Rossiya Tashqi ishlar vazirligi bu ayblovlarni “asossiz” va “bema’ni” deb atadi hamda javob choralari ko‘rilishini va’da qildi.

Rossiya axborot agentliklarining xabar berishicha, Chexiyaning Rossiyadagi elchisi Vitezslav Pivonka Rossiya tashqi ishlar vazirligiga chaqirilgan.

Avvalroq Polsha, Britaniya va NATO AQShning Rossiyaga qarshi sanksiyalarini qo‘llab-quvvatladi. Shunday bo‘lishiga qaramay, Bayden va Putinning uchrashuvi o‘z kuchida qolishi ma’lum qilindi.

Shuningdek, Jo Bayden Rossiya hukumatining “zararli tashqi harakatlari” tufayli unga qarshi sanksiyalar joriy qilgandan so‘ng, 15-aprel kuni Rossiya haqida bayonot chiqardi.

“Agar Rossiya bizning demokratiyamizga aralashishda davom etsa, men bunga javoban keyingi choralarni ko‘rishga tayyorman. Bu mening AQSh prezidenti sifatidagi vazifam”, — dedi Bayden Oq uydagi bayonotida.