Polsha prezidenti Anjey Duda Kiyevga keldi, u Ukraina prezidenti Vladimir Zelenskiy bilan uchrashadi, deya xabar bermoqda Polsha rahbari kanselyariyasi. Ikki yetakchining uchrashuvi Ukraina mustaqilligi kuni arafasida bo‘lib o‘tmoqda.
Dudaning Kiyevga tashrifi haqida bu safar ham oldindan e’lon qilinmagan.
“Tashrif chog‘ida prezidentlar va delegatsiyalar o‘rtasida Ukrainadagi vaziyat, harbiy, iqtisodiy va gumanitar sohalarda qo‘llab-quvvatlash, o‘zaro hamkorlik bo‘yicha ikki tomonlama muzokaralar o‘tkaziladi”, — deyiladi xabarda.
Bundan tashqari, Duda “Qrim platformasi” ikkinchi sammitida ishtirok etadi.
Dudaning Ukrainaga tashrifi Ukrainada 24-avgustda nishonlanadigan Mustaqillik kuni arafasida amalga oshirilmoqda. O‘sha kuni raketa hujumlari uyushtirilishi xavfi sabab AQSHning Kiyevdagi elchixonasi o‘z fuqarolarini Ukrainani tark etishga chaqirgan.
Duda va Zelenskiyning mazkur uchrashuvi yil boshidan beri beshinchi va Rossiyaning Ukrainadagi bosqini boshlanganidan beri uchinchi uchrashuvdir.
May oyidagi tashrifi chog‘ida Duda Ukraina Oliy Radasida shaxsan so‘zga chiqqan. O‘z nutqi davomida u Ukraina Yevropa Ittifoqiga a’zo bo‘lmaguncha “tinchimasligi”ni aytgan. Duda shuningdek, yaxshi qo‘shnichilik to‘g‘risidagi yangi Ukraina—Polsha shartnomasini imzolashni taklif qilgan va Polshaga ko‘chgan Ukraina fuqarolari mamlakat uchun qochqin hisoblanmasligini ishontirib aytgan.
Izoh (0)