Huawei rasman MateBook Fold Ultimate Design’ni taqdim etdi, uni dunyodagi birinchi buklanadigan ekranli kompyuter deb atamoqda, deb xabar beradi HuaweiCentral.
Yangi mahsulotning qalinligi ochilgan holatda atigi 7,3 mm, og‘irligi esa 1,16 kg bo‘lib, klaviaturaga ega emas — qurilmaning pastki qismi yopiq holatda sensorli klaviatura sifatida ishlatiladi.
Tandem OLED displeyi ochilgan holatda 3,3K o‘lchamli 18 dyuymli diagonalga ega bo‘lib, tomonlar nisbati 4:3 ga teng, buklangan holatda esa nisbat 3:2 ga teng bo‘ladi.
MateBook Fold ekrani keng P3 rang gammasini, shuningdek, HDR Vivid va HDR rejimlarini qo‘llab-quvvatlaydi. Huawei bu dunyodagi birinchi moslashuvchan yangilanish tezligiga ega va o‘z sinfidagi eng past energiya isteʼmoliga ega bo‘lgan tijorat displeyi ekanligini taʼkidlaydi.
Konstruksiyaning asosiy elementlaridan biri bu 285 mm uzunlikdagi sharnir (aylanma kinematik juftlik, yaʼni ularga aylanma harakatni taʼminlaydigan ikki qismning qo‘zg‘aluvchan birikmasi) bo‘lib, ishlab chiqaruvchining taʼkidlashicha, u oddiy noutbuklardagi sharnirlardan ancha katta yuklarga bardosh beradi. U qurilmani 0 dan 20 darajagacha bo‘lgan burchaklarga silliq ochishga imkon beradi va uni 30 dan 150 darajagacha bo‘lgan chegaralarda mahkamlaydi.
Sovitish uchun ikkita ventilyator va o‘ta yupqa bug‘latish kamerasi ishlatiladi, orqa panel metalldan yasalgan va charm bilan qoplangan. Shuningdek, yumshoq ochilish mexanizmiga ega o‘rnatilgan taglik ham mavjud.
MateBook Fold Huawei tomonidan ishlab chiqilgan HarmonyOS operatsion tizimida ishlaydi. U brendning boshqa qurilmalari — smartfonlar, planshetlar, kompyuterlar bilan birgalikda ishlash funksiyalariga ega. Huawei ekosistemasidagi qurilmalar o‘rtasida maʼlumot uzatish tezligi 160 MB/s ga etadi.
32 GB operativ xotira va 1 TB SSD bo‘lgan modelning narxi 23 999 yuan (taxminan 3328 dollar), 2 TB xotira bo‘lgan versiyasi esa 26 999 yuan (taxminan 3744 dollar). Hozirda yangi mahsulot faqat Xitoyda mavjud va global bozorga chiqarilishi haqida hali hech qanday maʼlumot yo‘q.
Izoh (0)