Apple kompaniyasi Samsung’ni ortda qoldirib, iPhone smartfonlarining rekord hajmdagi savdolari fonida dunyodagi eng yetakchi brendga aylandi. Kompaniya o‘tgan yilning so‘nggi choragida Huawei pozitsiyasi jiddiy kuchsizlangani sabab katta “sakrashni” amalga oshirdi, deb xabar beradi IXBT.
Counterpoint Research ma’lumotlariga ko‘ra, o‘tgan chorakda iPhone smartfonlarini yetkazib berish 22 foizga ortgan. Bu kabi o‘sish beshinchi avlod aloqa tarmog‘ini qo‘llab-quvvatlaydigan iPhone 12 lineykasining taqdim etilgani bilan izohlanmoqda. Shuningdek, oldingi modellar savdosi ham kamaymagan, narxlar pasaytirilgan bo‘lsa-da, talab barqaror.
Kompaniya 90 million dona smartfon sotib, bozorning 23 foizdan ortig‘ini egallagan. Tahlilchilarning ta’kidlashicha, Apple Xitoydagi premium smartfonlar bozorida o‘z o‘rnini kuchaytirib olgan. Apple bosh direktori Tim Kukning so‘zlariga ko‘ra, Xitoyda eng ko‘p sotiladigan premium smartfonlarning uchtadan ikkitasi Apple tomonidan ishlab chiqarilgan.
Chorak yakunlari bo‘yicha ikkinchi o‘rin Samsung’ga nasib ketdi — bozorning 19 foizi. Uchinchi o‘rinni Xiaomi egallagan bo‘lsa, uning ortidan Oppo va Vivo joylashgan. Huawei esa 6-pog‘onaga tushib ketgan.
O‘tgan yilgi natijalar ko‘rib chiqiladigan bo‘lsa, oldingi uchta chorakda Samsung yetakchilik qilgan, Apple — ikkinchi o‘rin.
Eslatib o‘tamiz, 2020-yilning dekabrida Gartner tahliliy kompaniyasi jahon bozoridagi smartfonlar savdosi bo‘yicha uchinchi chorak hisobotlarini e’lon qilgandi. Unga ko‘ra, Xiaomi birinchi bor Apple’ni ortda qoldirgandi.
Izoh (0)