LG kompaniyasi o‘zining noodatiy ixtirosi — to‘liq ramkasiz microLED televizorni namoyish etdi. U ikkita 22 dyuymli paneldan iborat bo‘lib, ekran yaxlit keng tasvir sifatida ishlashi yoki ikkita mustaqil displeyga ajralishi mumkin.
Bunday effekt microLED’ning yangi arxitekturasi va panellarni aniq ulash texnologiyasi orqali amalga oshirildi. Natijada tasvir butun bir ekran kabi ko‘rinadi, hatto yaqindan qaralganda yoki qo‘l bilan tekshirganda ham panellar orasida hech qanday chiziq sezilmaydi.
MicroLED texnologiyasi nafaqat mukammal qora ranglar, yuqori yorqinlik va aniq rang uzatilishini ta’minlaydi, balki chidamlilik, qizib ketmaslik, har bir piksel yorqinligi hamda rangini alohida sozlash imkoniyati bilan ham ajralib turadi. Bu esa umumiy yoritish texnologiyalariga asoslangan boshqa televizorlarga nisbatan aniqroq va reallikka yaqin tasvirlar uzatilishini ta’minlaydi.
LG bunday panellarning tijorat maqsadlarida, masalan, istalgan shakl va o‘lchamdagi noodatiy displeylar yaratishda foydali bo‘lishini ta’kidlamoqda. Shuningdek, ularni uyda, masalan, bir nechta paneldan iborat ulkan ish monitorini yig‘ish uchun ham ishlatish mumkin. MicroLED ishlab chiqarish xarajatlari yuqoriligiga qaramay, kompaniya bu yo‘nalishga sarmoya kiritishda davom etmoqda.
Izoh (0)