So‘nggi texnologiya, ilm-fan va biznesga oid yangiliklarni yorituvchi The Verge nashrida yangi Oppo Find N5 smartfonining suratlari joylashtirildi. Mazkur gadjet kitob ko‘rinishida buklanadigan dunyodagi eng ingichka smartfon bo‘lib, o‘zining ultra yupqa dizayni va ilg‘or texnologiyalari bilan ajralib turadi.
Oppo Find N5 ning rasmiy taqdimoti joriy yil fevral oyining oxirida Xitoyda bo‘lib o‘tishi kutilmoqda. Keyinchalik ushbu model xorijiy bozorlarga, jumladan, AQSHga OnePlus Open 2 nomi bilan eksport qilinishi rejalashtirilgan.
Buklangan holatda Find N5 boshqa shunga analog qurilmalar ichida eng ingichkasi hisoblanadi, biroq ochilganda, qalinligi bo‘yicha Huawei Mate XT modelidan ortda. Oppo’ning eng so‘nggi modeli bunday parametrga ikki panelli mexanizm tufayli erisha oldi. Ular smartfon yig‘ilganda yanada ixcham bo‘lishiga zamin yaratadi.
Rekord darajada ingichka bo‘lishiga qaramay, Oppo Find N5 ko‘p shikastlanishga bardoshli va baquvvat qurilmadir. Uning USB-C ulagichi metall ramka ichiga kiritilgan. Asosiy kamerasi maxsus periksop linzasiga ega bo‘lib, u uzoq masofadan ham sifatli suratlarni olish imkonini beradi.
Qurilma Qualcomm Snapdragon 8 Elite chipi bilan ta’minlangani hisobiga yuqori unumdorlik va energiya samaradorligini ta’minlaydi. Shuningdek, Oppo Find N5 IPX6, IPX8 va IPX9 kabi yuqori darajadagi suvga chidamlilik sertifikatlariga ega bo‘lib, bu uni suv ostida ham foydalanish imkonini beradi.
The Verge ma’lumotlariga ko‘ra, smartfon oq va qora rangda ishlab chiqariladi. Uning binafsha rangli versiyasi esa hozircha faqat Xitoyda sotuvga qo‘yiladi.
Izoh (0)