Smartfonlar hayotimizga shu qadar chuqur kirib kelganki, ko‘plab odamlarda gadjetlarga nisbatan qaramlik shakllangan.
Amerikaning Metaphone startapi ushbu muammoni yechish uchun noodatiy taklif berdi: bu 6,35 mm qalinlikdagi mustahkam, shaffof akrildan yasalgan smartfon nusxasi bo‘lib, qo‘lga olinganda haqiqiy telefonga o‘xshab ketadi, ammo hech qanday texnik funksiya bajarmaydi.
Metaphone’ning bu noodatiy “gadjeti” tashqi ko‘rinishidan shishani eslatadi, u sinmaydigan akril materialidan tayyorlanib, hajmi iPhone 15 modeliga moslab ishlangan.
Qo‘lda ushlaganda yoki cho‘ntakda olib yurganda u haqiqiy smartfonni eslatadi, shuning uchun foydalanuvchida sevimli gadjeti yonidagidek taassurot paydo bo‘ladi hamda xavotir hissi kamayadi.
Plastinka orqali ko‘rinmas lentani varaqlayotgan video TikTok’da mashhur bo‘lib, 50 milliondan ortiq marta ko‘rildi.
G‘oya amerikalik Erik Antonovga tegishli. Uning startapi Indiegogo kraudfanding platformasida 500 dollar o‘rniga 1 100 dollar to‘pladi.
Metaphone’ning shaffof plastinkalari Indiegogo orqali sotuvga qo‘yilgan, biroq hozircha barcha nusxalar sotib bo‘lingan. Shaffof “gadjet” narxi hozirda 20 dollar pushti versiyasi esa 25 dollar turadi. Dastlabki ishlab chiqarish ishlari 2025-yil iyun oyiga rejalashtirilgan.
Ushbu ixtironi xarid qilgan foydalanuvchilar aytishicha, ijtimoiy tarmoqlarga ko‘p chalg‘iydiganlar uchun bunday plastinka ko‘proq kitob o‘qishga va fikrlarni jamlanishga yordam bermoqda.
Izoh (0)